تي سيبوا أمها النهضة… شوفوا حاجة أخرى تلهاو بيها
قد ما فهمناكم و شي ما حبيتوش تفهموا ؟؟؟
انا والله ماني فاهمة الناس اللي تحرض وتسخن وتزايد على النهضة وين يحبوا يوصلوا ؟؟؟ تحبوا تدزوها في وجه المدفع ومبعد تجبدوا بيها ؟؟؟ تي ماهو قلنالكم الشعب بيوع وبايع الثورة وبايع الطرح، علاش تحبوا النهضة تخرج راسها والعاصفة مازالت هايجة من أبوظبي إلى واشنطن؟؟؟
حد قاللكم ان الانتحار شيء محمود في السياسة ؟؟؟
تي تعلموا يهديكم ربي والا على الأقل احترموا وجهة النظر متاع النهضة وقولوا : عندها وضع خاص ولازم نراعي عاصفة الحملة الغربية العربية الصهيونية على الربيع العربي وتحديدااا على الإخوان ومشتقاتهم وحركات ما يسمى الإسلام السياسي..
فما مهبول شاف الكارثة اللي صارت للإخوان وماااا أدراااك ما الإخوان في مصر اللي عددهم بالملايين غادي، ومبعد يخرج يشبرش ويتقبح في النهضة ويقول شبيها ما عملتش وما ڤدتش وما كذا وما كذا ؟؟؟
جاب ربي المرزوقي نفسو قال بصريح العبارة كان فما انقلاب واتصلوا بالضباط وجهزوا لتحرك.. وقيادة اعتصام الخيانة كانوا قابلين فكرة قتل 20 ألف تونسي من أجل شنوا ؟؟؟
من أجل إزاحة المرزوقي ؟؟؟ لا
من أجل إزاحة بن جعفر ؟؟؟ لا
بل من أجل إزاحة النهضة وسجن وقتل وتعذيب من فيها.
والفلوس موجودة والدعم الدولي جاهز ما بقى كان تحرك الدبابات والمصفحات.
بعد هذا الكل، ما تعذروش النهضة لما تبحث عن حلول سياسية تحفظ بها مناضليها وأنصارها من الاستئصال والتدمير وتحفظ تونس من الانزلاق إلى مواجهة مسلحة من الشمال إلى الجنوب؟؟؟
هل مكتوب على جبينهم انهم يقعدوا حياتهم الكل حزب معارضة من حبس لحبس ومن مقبرة لمقبرة ومن منفى لمنفى ؟؟؟
اليوم هوما حزب في الدولة وحزب عندو ساق في الحكم، ولازم يسمر روحو فيه حتى يدخّل ساقو الثانية ثم يدخل بكلو ويصبح هو الدولة…
هاذي خدمة متاع 10 و 15 سنة لقدام موش خدمة متاع خفة وشطارة ومزايدات وشعارات محلقة في الفضاء.
هيا سيدي نقولوا مشات النهضة بهواكم وقلبت الطاولة على النداء وخرجت من الحكومة وقالت نشد المعارضة في المجلس ونستنى الانتخابات الجاية، تتخيلوا ان الاستئصاليين موش باش ينتهزوا الفرصة ويقفزوا على الحكم ويكرروا ضدهم سيناريو 91 ؟؟؟
باهي نفترضوا قرروا ذلك، شكون باش يحميهم ؟؟؟ شعبنا الخبزيست السكارجي الزطال اللي كلمة تهزو وكلمة تجيبو واللي يقلك اخطى راسي واضرب واللي مع الواقف ؟؟؟
باهي النهضة جبانة وبيوعة وسخطة على مخها وعلى مخ قيادتها وقطيعها واللي تحبوا انتوما الكللللل… بقلة ليها وفي ستين داهية.. هات ورّيونا أنفسكم… أين أنتم ؟؟؟ أين مقراتكم ؟؟؟ أين أنصاركم ؟؟ أين ملتقياتكم ؟؟؟ أين تجمعاتكم ؟؟؟ أين هويتكم وبرامجكم ومقترحاتكم وتصوراتكم وو و و و و و و..
لما تجاوبوا على الأسئلة هاذي، وقتها يبدا الكلام واضح ومعقول ومفهوم.. كما قال عتبة بن ربيعة في غزوة بدر : أخرجوا إلينا نظراءنا.
والله العظيم لا عندي مشكلة لا مع المرزوقي ولا مع من يناصره لأنني أصلا من أنصاره ولكن أتفهم خيارات النهضة وألتمس لها الأعذار ونفهم الحوارات والنقاشات الحامية اللي صارت في مجالسها حتى لين وصلت لخيار التوافق ونلخصهالكم بجملة قالها رئيس النهضة أووول ما بدات حكاية الدخول في حكومة النداء وهي مثل انڤليزي قاله : إذا لم تغلبه فصاحبه.
وشبه ذلك بالملاكم لما يعجز عن إسقاط خصمه، يلتصق به ويحاول تعطيل يديه حتى لا تفعل فعلها ضده.
حتى ولو أخذت النهضة وزيرا واحدااا في الحكومة، ما يقلّقهمش، المهم عندهم مسمار جحا في الحكومة وعندهم صبع ساق، موش حتى ساق في الحكم.
هذيكا خيارات النهضة اللي ماهيش خيارات شخصية كما يزعم البعض ولا هي نزوات فردية بل هي نتيجة نقاشات مطولة وتقليب للأمور على كااافة وجوهها.
وطبعا كل خيار له عيوبه ومساوئه وإكراهاته… ولكن عند الترجيح وقياس المصلحة والمفسدة، تبين ان خيار التوافق أقل مفسدة من خيار المعارضة اللي ممكن تقلب وضع النهضة والبلاد 20 سنة إلى الخلف لا قدر الله.
كلامي ليس موجها لأحد بعينه وكل ما أطلبه هو احترام النهضة وتفهّم سياساتها وخياراتها بدل المزايدات الجوفاء.