المولدي يحب على مبروكة..
نصر الدين السويلمي
المولدي خرج هو وبوه يوردوا في البراكيس، علاليش فصلوهم على الغلم، وخلوهم عندهم في الزريبة باش يعلفوهم وباش يجلبوهم كي يقرب العيد.. والغلم بعيدة في أرضهم الكبيرة عند السارح..
المولدي طفل واحد في 6 بنات، قبل ما يخرج هو وابيو يلزوا ليه البنات خواتوا، قالولوا بنات خالتي جو بحذانا بايتين وعندهم عامين ما عفسوش البر وكان تقنع ابوي يذبح لينا لدرع !!! تفجع المولدي قالهم ابوي تقولولوا اذبح المولدي وما تقولوش ليه اذبح لدرع.. خلاهم وامشى.. المولدي حنين ياسر على خواتو البنات، ما يحبش فيهم..
بو المولدي عندو ميولات صوفية، في الطريق قرر المولدي باش يفاتحو في الذبيحة، بدا المولدي يتكلم: ابوي تو سيدي عبد القادر يسمّى عالم والا راجل صالح! قالوا صالح وعالم وعابد…. ابوي زعمة الكرامات الكل صحيحة الي يتحدثوا عليها عند سيدي عبد القادر؟ أي بالطبيعة وأكثر من هكاكا برشا.. ابوي تذبح لينا لدرع!!!!!!!!!!!!!! خيم السكوت على المكان والزمان.. تقريب حتى الدڨفت والمثنان لبد ما عادش يتحرك خايف من بطش ابوي المولدي..
بعد صمت دقيقتين او ثلاثة تكلم الاب قال: المولدي، قال المولدي نعم اوبي، قالو تسمع فيا؟ قالوا نعم ابوي نسمع، قالو تعرف الي انا مخبي عليك سر من صغرتك ولازم نقول هولك تو، قالو شنو ابوي، قالو تعرف الي انت ولد حرام… سكت المولدي وسكتت من حولو الدنيا..
روح المولدي.. المولدي يعرف بوه يحب امو ياسر، خذاها صغيرة عليه برشا بنت 15 عام وهو 37.. المولدي طالع عنايدي لبوه يحب يشعّل النار، لز لأمو وقالها ما غاضتني منو كان كلمة ولد حرام!!! فهمت أمو القصة.. جبدت شلامتها شلمت دبشها وخرجت وراجلها في جرتها يحاول ويترجا، ايا قبل الجبل بشوي قنعها ورجعها.. كي وصل للدار من فرحتو برجوع مرتو ذبح لدرع…. وقبل ما تبات البناويت وامهم وبنات خالتهم يشوو، عيط الاب على المولدي وقالوا جاني الخبر الكبش فرس الحڨ شوف… المولدي ما عندوش خيار رغم انو عارف بوه يحب يحرموا من سهرية باهية… لحق المولدي لغلم، وصل قبل التماسي بشوي، قال للسارح برا روح تو نعشي شوي ونڨود.. المولدي كان ناوي على “الشر” على هذاك جاب معاه موس.. جبد الكبش إلي هو فحل الغلم، لطخوا وذبحو.. عيط على السارح قالوا راو فرس!! قالو احليلي كيفاش فرس لا شعير لا سخانة لا ماء !!! قالوا فرس وهذاكا هو!!! من غادي بو المولدي والبنات وبنات خالتهم وامهم بايتين يشووا ومن هنا بات الموالي هو وعائلة السارح يضربوا في المشوي لعڨابات الليل..
الصباح خلى المولدي الصڨيطة الكل للسارح، رمى الجلد على ظهر البهيم.. رْكب ونصب ڨدامو قرون الكبش وڨال للبيهيم إرْ.. روح المولدي… عرضوا بوه قالوا شنو هذا، قالو راس الكبش وجلدو، ماو نڨرو الدم كيما ڨتلي انت وبعثتني ليه، خلط عليه خلوط وليت حللتو قبل ما يموت جيفة… المولدي هبل!!! كيفاش بوه جاي من بعيد يتبسم ويدحڨ في قرون الكبش!!! وزاد سهلو بالشوي ومن غير عياط! وزاد بوه فاهم اللعبة وفاهم إلي الكبش مشا في العناد! كيفاش بوه ما هبلش على الكبش فحل الرسلة!!!!
دخلوا للدار، جاء المولدي خارج، قالوا بوه اڨعد! نادي على امك، ناداها المولدي جت… ڨالها اسمعي يا مرا! الشخاري علاش ما حبش يعطينا مبروكة للمولدي؟ ڨاتلوا ماو طلب 20 نعجة انت ڨلت ما يشوفهمش كي يموت!! ڨالها حضري روحك، غدوة نسوڨوا ليه 40 نعجة ونخير ليه فحل من البركيس الي عندي، ڨاتلوا ماك لباس برك! ڨالها شوفي! المولدي ورد على الكبش وذبحوا، ولدك ڨلبوا كاسح وما يباتش على الضيم.. و الراجل الي ما يباتش على الضيم نعطي عليه رسلتي وجبتي ولحفتي كان لزم…
من باب المفارقات او بالأحرى من تصاريف القدر.. المولدي ولَد واحد في 6 بنات، تزوج مبروكة جابت 6 اولاد وبنية وحدة.
يحدث في ريف القصرين..