انتصار الشعب العميق على باشمارغا الدولة العميقة…
عايدة بن كريّم
نتائج الإنتخابات أثبتت انتصار الشعب العميق على باشمارغا الدولة العميقة…
انتصار شعب النهضة على قناة الحوار …
انتصار جمهور قطوسة الرماد على جمهور “فكرة سامي الفهري”…
انتصار جمهور سانفارا على جمهور نضال السعدي وجوقة نهار الأحد ما يهمك في حدّ…
انتصار جمهور لطفي العبدلي على جمهور بولبيار وكاميليا…
انتصار جمهور الجوّادي على جمهور ألفة يوسف…
انتصار جمهور البشير بن حسن على فلوس محسن مرزوق…
انتصار خفّة سيف الدين مخلوف على رصانة سنية الدهماني…
انتصار عروبة الصافي سعيد على مشروع محمد الشرفي التغريبي.
انتصار سالم لبيض على محمد محجوب…
انتصار فوضى حي هلال والزهروني والسيجومي والملاسين والكبارية على رُقيّ ونظام أحياء المرسى وسيدي بوسعيد والمنازه…
انتصار سجنان والذواودة وبازينة على بلدية العاصمة…
انتصار علي بن غداهم على أحمد باي ومصطفى خزندار…
•••
- 60 سنة والسواحلية والبلدية مهيمنين على “الدولة” بمشروعيات “هيبة الدولة” و”الحداثة” وسلالة البايات وخدمهم وحشمهم من عائلات “بن عاشور” و”قايد السبسي” و”المبزّع”…
- 60 سنة والمخازنية باركين على تونس ومُحتكرين “المواطنة”… وعايشين في البلاد كأنها مزرعة ورثوها على المُقيم العام… والبقية أقنان وعبيد سخّرتهم “الدولة الحديثة” لخدمة أربعة عائلات نساها وراه محمود بن عياد قبل هروبه بخزينة الدولة.
- 60 سنة والباشمارغا المُثقّفة واقفة ضدّ تيار التغيير… وتدافع على أوهام “الدولة الوطنية” وتبارك في انتصارات “التحوّل” وتناشد في “الجهل المُركّب” وتصفّق للعسكر.
- 60 سنة والإعلام يخدم في اتجاه واحد… اتجاه يهزّ لانتخابات نتائجها كما شفنا البارح.
•••
الشعب العميق كان بحاجة لـ”معول” حتى يحطّم منظومة تأسست على الإغتيالات والإقصاء واحتكار “الحقيقة”…
جمهور النهضة كان بحاجة لفرحة تخرّجه من حالة الشكّ وتُعطيه فرصة باش يتنفّس على راحته…. انتصار يخليه يفكّر بأمان في مستقبل أولاده دون خوف من الدبابة ومن حذاء العسكر… بحاجة للحظة يعيش فيها دون تشكيك في مواطنته.
لا حقيقة بعد اليوم غير “الشعب يريد”… التغيير قادم من تحت.
مبروك للشعب العميق هذا الإنتصار… سواء كنتم في حزب النهضة أو في قلب تونس تستاهلوا الفرحة….
البقية تفاصيل… يحكوا فيها المُحنّكين.