تدوينات ساخرة

ماشي ننتحر !!!

الحبيب حمام

• شتعمل غادي؟ وين ماشي؟
ـ ماشي ننتحر.
• علاه تنتحر؟ الدنيا حلوّة، ومازلت صغير.
ـ باش نحكي ليك حكايتي، وأنت أحكم.
• هاني نسمع فيك.
ـ أنا مواطن تونسي، انتخبت في 2014.
• شفت محلاك! أنت مواطن مسؤول، علاش تنتحر؟ يهديك ربي.
ـ يا ولدي اسمعني، المشكل موش غادي.
• هاني نسمع فيك.
ـ النداء فاز، يعني جاء الأول، والنهضة جات الثانية.
• وهذا مقلقك، وهذاك علاش تحب تنتحر.
ـ يا ولدي اسمعني، المشكل موش غادي.
• هاني نسمع فيك.
ـ بما أن النداء جاء الأول شكّل الحكومة.
• معقول.
ـ بقيادة الحبيب الصيد
• وهذا مقلقك، موش كفء؟ وهذاك علاش تحب تنتحر.
ـ يا ولدي اسمعني، المشكل موش غادي.
• هاني نسمع فيك.
ـ بعد فترة ومن غير سبب، ظهر للنداء باش يبدّل الحكومة.
• لعب الصغار، وهذا مقلقك، وهذاك علاش تحب تنتحر.
ـ يا ولدي اسمعني، المشكل موش غادي.
• هاني نسمع فيك.
ـ شكل حكومة أخرى بقيادة واحد شباب، اسمه يوسف الشاهد.
• يخي قلت ولد طايش، وهذا مقلقك، وهذاك علاش تحب تنتحر.
ـ يا ولدي اسمعني، المشكل موش غادي.
• هاني نسمع فيك.
ـ بعد فترة ومن غير سبب، ظهر للنداء باش يبدّل الحكومة
• لعب الصغار، وهذا مقلقك، وهذاك علاش تحب تنتحر.
ـ يا ولدي اسمعني، المشكل موش غادي.
• هاني نسمع فيك.
ـ النداء، ماهو الحزب الفائز في انتخابات 2014، شكل حكومة جديدة بقيادة يوسف الشاهد نفسه.
• هو حر، ويتحمل مسؤوليته لأنه الفائز في الانتخابات، ويحكم بالفريق الذي يريد. ما تقوليش هذاك علاش تحب تنتحر.
ـ يا ولدي اسمعني، المشكل موش غادي.
• هاني نسمع فيك.
ـ النداء شكل الحكومة منا، ومشى للمعارضة منا.
• شنوة؟ شكل حكومة ومشى للمعراضة، شنيه ها الشكشوكة! تخلويض، ولكن هذا موش مبرر باش تنتحر. يهديك ربي.
ـ يا ولدي اسمعني، المشكل موش غادي.
• هاني نسمع فيك. يا ولدي جيب لي الرسمي، علاش تحب تنتحر؟
ـ استنى شويه.
• هاني نستنا فيك.
ـ مشى للمعارصة وخلى الوزراء متاعو في الحكومة.
• شنوة؟ الحكومة متاعو والمعارضه متاعو؟ بالك وزير وإلا ثنين استقالوا من النداء وبقاوا في الحكومة، تخلويض ولكن هذا موش مبرر باش تنتحر. يهديك ربي
ـ يا ولدي اسمعني، المشكل موش غادي.
• هاني نسمع فيك. يا ولدي جيب لي الرسمي، علاش تحب تنتحر؟
ـ استنى شويه.
• هاني نستنا فيك.
ـ بقاوا 14 وزير وكاتب دولة في الحكومة، كلهم من النداء ما استقال حد، والنداء في المعارضة،
• ممكن تعاود لي لو سمحت.
ـ ونزيدك: الأمين العام متاع النداء هو رئيس الحزب الوطني الحر، والرئيس متاع النداء هو ولد رئيس الجمهورية، ورئيس الجمهورية يحكم في البلاد، وهو معارض الحكومة متاع حزب النداء اللي أسسه هو بنفسو في 2012.
• قتلي رئيس الجمهورية في المعارضة، والحزب الحاكم في المعارضة، و14 وزير وكاتب دولة، وأنت مازلت عايش. خويا بصراحة، أريسطو ومعاه آيشتاين ما يفهموهاش هذي، بره توكل، انتحر على روحك.
ـ هاني باش نتوكل.
• اسمع، اسمع، الحبل هذاك يتقطع، تو نجيب ليك حبل أغلظ، باش تجيك خنقة ماكنة. استنى شويه.
ـ هاني نستنا فيك.

عزيزي القارئ، إن لم تفكر في الانتحار وأنت تقرأ هذه القصة، فأبشر، فقد آتاك الله صبر أيوب.
قصة تعكس الواقع المضحك الذي نعيشه.
سيناريو وحوار الحبيب حمام

اترك رد

مقالات ذات صلة

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock