إجتماع المكتب التنفيذي للنهضة..
الحبيب حمام
في أفريل 2012، اجتمع المكتب التنفيذي للنهضة.
• رئيس الجلسة: فمش حاجه ناقشوها اليوم؟
• الأعضاء غزروا لبعضهم: ما فما شي، ما عنا ما نعملوا، المشاكل كلها تحلت.
• رئيس الجلسة: معناها نرفعوا الجلسة. أيه، في أمان الله، ما تنساوش تحافظوا على الصلاة الوسطى وقوموا لله قانتين “وحسّنوا سرائركم، اذكروا الله جهرا وسرا”.
• أحد الأعضاء: استناوا، الدنيا ڤينيا، ونحن ننشوا في الذبان، نفكروا في حاجه نعلموها.
• عضو ثاني: على ذكر “وحسّنوا سرائركم، اذكروا الله جهرا وسرا”، شنوه رايكم نؤسسوا جهاز سري؟
• الأعضاء غزروا لبعضهم🤔: والله فكرة باهية، والله عالم السرائر يوصي بحسن السريرة ورسوله يقول: استعينوا على قضاء حوائجكم بالسر والكتمان.
• عضو ثالث: رغم أن هناك من ضعّف الحديث، فكرة الجهاز السري ممتازة.
• عضو رابع🤔: نحن شكلنا الحكومة، وعينا وزير الدفاع ووزير الداخلية، وفي كل وزارة من الاثنين هناك جهاز استخبارات، شنعملوا بيه ها الجهاز السري؟
• رئيس الجلسة: يعمل الله، تو نشوفو ليه دور، اعطينا نؤسسوه، هذا المهم. وفي كل الحالات خير ماللي نقعدو ننشو في الذبان، إذن على بركة الله، نقارو الفاتحة.
• وهوما خارجين، عضو خامس: يا جماعة، لقيت دور للجهاز السري. يغتال فرانسوا هولاند.
• الأعضاء غزروا لبعضهم🤔: خارق للعادة، يعطيك الصحة، على بركة الله، هذي نقراو ليها سورة البقرة.
امشي يا زمان وايجى يا زمان، 93 مرة يجتمع المكتب التنفيدى وما يلقاش حتى نقطة للنقاش. في المرة 94:
• رئيس الجلسة: فمش حاجه ناقشوها اليوم؟
• الأعضاء غزروا لبعضهم🤔: كي العادة، ما فما شي، ما عنا ما نعملوا، المشاكل كلها محلولة، وأمور البلاد 5 على 5، صحيح فمّه براكاج كل يوم، ودبش المسافرين مسروق في المطارات، وقرابة المليون بطال، والدينار طاح من القسم الخامس وهبط يكوّر في الحُوُمْ، ولكن خير من غيرنا، خير من ليبيا، والسودان وسوريا واليمن والموزمبيق، والشاهد ناجح في البرنامج متاعه.
• أحد الأعضاء: استناوا، الدنيا ڤينيا، ونحن ننشوا في الذبان، نفكروا في حاجه نعلموها.
• عضو ثاني: على ذكر “والشاهد ناجح في البرنامج متاعه”، شنوه رايكم نؤسسوا له حزب، باش يواصل في البرنامج متاعه؟
• الأعضاء غزروا لبعضهم🤔: والله فكرة باهية، مادام عنده برنامج وناجح فيه كيما قال الأخ، ونحن في كل الحالات نبيعوا في الريح للمراكب، خلينا نعملو حاجه.
• عضو ثالث: واشنيه منفعتنا نحن في الحكاية؟
• رئيس الجلسة: اعطينا نؤسسوه، هذا المهم. منفعتنا تو نفكرو فيها من بعد، وفي كل الحالات خير ماللي نقعد ننشو في الذبان، إذن على بركة الله، نقراو الفاتحة.