الإثنين , 17 فبراير 2020
الرئيسية / تدوينات تونسية / سالم لبيض في تصريح أسود..

سالم لبيض في تصريح أسود..

صالح التيزاوي

أما سي سالم لبيض فعلو في السّياسة لا طلع أبيض ولا سالم من حروف العلّة، طلع ناقص وأجوف.. يدور من بلاطو لبلاطو وهو يعيّط “ماناش شنتحالفو معاهم”.. وبقدرة قادر ملّي طلع بفكرة الإنقلاب على الدّستور، البلاطوات الكل تحلّت في وجهو كيف ماكانت الجبهة.. جماعة الدّولة العميقة يكبرو فيه باش يناطحو بيه..

سيدي خويا ماتحبّش تشارك في الحكومة وتحب تعارض مع الفاشيّة والفساد… عارض للعهدة الجاية.. إنت حر… أما من غير ماتنقلب على دستور البلاد.. ومن غير ما تركب على التّفويض الشّعبي إلّي حازو سعيد… ماهواش مبرّر باش تنقلب على دستور كامل.. وهذا إلّي يخوّف في شبّيحة الفكر القومجي،.. الفكر الإنقلابي إلّي ما تعافوش منّو ومزّال عندهم حنين للتجارب الإنقلابيّة إلّي جابت للأمّة الخراب والدّمار.. لا تعمل فيها ضحيّة، تبكي وتشكي لمريم، هام يهرسلو فيّا في شبكات التّواصل، ولا تعمل فيها صيد بوقلادة.. (مانتحالفش مع الفاشلين ومانحطش ايدّي في ايدهم على خاطر تحالفو مع المنطَومة القديمة)… هذا اسمو تفوريخ سياسي.. الشّعب، نقصد التونسي موش حركة الشّعب ما عطاكش المرتبة الاولى باش تتشرّط على جد والدينا.. بعشرة كراسي تحب تعمل انقلاب على الدّستور إمّالة لوكان جاو خمسين، آش تعمل فينا؟! تضربنا بالبراميل المتفجّرة!! وزيد تحصّلت عليهم بأكبر البقابا وأصوات الجبهة.. وما تعملش فيها الخضرا الشريفة (تحالفو مع المنظومة القديمة).. كانك ناسي نفكرك، وقتلّى تحط قانون تحصين الثّورة، ماكم قلتوا : لا للعقاب الجماعي، على خاطر وقتها، إنتم في حاجة لمكينة المنظومة القديمة باش تكسروا بيها حكومة الترويكا.. الصحيح، فمّ حقد أعمى معشّش في مخّك وماكش قادر تنسى هاك العركة القديمة إلّي صارت عام ستّين بين عبد النّاصر وسيّد قطب… ويلزمك تفهم مليح ولو أنّي عارف إلّي عمرك ماتفهم… لا إنت عبد النّاصر ولا النّاس إلّي تهرسل فيهم مزّالت عندهم حاجة تربطهم بفكر سيّد قطب.. تلك عهود قد خلت.. ومرجعيّات زالت واندثرت…

النّاس الكل شفاها ربّي من علل التّاريخ وسواد الحقب المظلمة مزّلت كان إنت وجماعتك وكل شوفيني معتل.. تعانيو من متلازمة الإسلام السّياسي والنْهضة.. وبالمناسبة يزّي مالعنتريات (التي لم تقتل ذبابة على رأي نزار قبّاني) وإنت تعرف في شكون قالها… كيف تقول ماتشاركش في حكومة تقودها النّهضة.. آش كنت تعمل في حكومة لعريض؟ الحاصيلو محلاك في المعارضة :على يمينك حزب المقرونة وعلى يمين يمينك الفاشيّة بكلها…

شاهد أيضاً

ملفّات الفساد: “تكشف… نكشف”

صالح التيزاوي تزامنا مع مسعى رئيس الحكومة المكلّف لتشكيل حكومته، كثر تبادل التّهم بالفساد بين …

بين السّياسي والمشتغل بالسّياسة

صالح التيزاوي بعد ستّين عاما من عمر دولة الإستقلال، ومهما كان حجم الإختلاف على الإستقلال، …