نصيحة أخوية.. حدثني على أفكارك وحلولك
بعد أقل من عام باش نحددو مصيرنا متاع الخمسة سنين الجايين وممكن متاع الخمسين سنة… الحكومة تعدات وقانون المالية تعدى دونك طفي عليك الحكايات الفارغة وركّز في حاجة وحدة: شكون باش تنتخب في 2019؟ وخاصة علاش باش تنتخبهم ؟
فمة خمسة مشاريع كبار :
- النهضة
- تحالف الباجي إتحاد الشغل الأحزاب الصغيرة ” التقدمية” وجماعة ياغنوشي يا سفاح
- يوسف الشاهد
- التيار الديمقراطي
- الجبهة الشعبية
===> ماتخليوش السياسيين يلعبولكم بأمخاخكم ويهزوكم لمشاكل جانبية… اليوم يلزمنا نطالبوهم ببرنامجهم الإنتخابي… شنوة تقترحو حلول للإقتصاد ؟ للتضخم ؟ لعجز الميزان التجاري ؟ للتصدير ؟ شنوة تقترحو حلول لمشاكل الصحة والتعليم ؟ شنوة تقترحو حلول ضد الفساد والرشوة وبطء الإدارة ؟ شنوة حلولكم ضد البطالة ؟ ضد الجريمة والعنف ؟ ضد الوسخ والزبلة والفوضى؟ ضد الإرهاب ؟ ضد إنفجار العائلة والطلاق وتدني الأخلاق وإنعدام المبادئ ؟ ضد تغوّل النقابات وتبوريبهم وفسادهم ؟ ضد تعطيل الإنتاج متاع الفسفاط والبترول ؟ شنوة تقترحو للسياحة والثقافة ؟ شنوة حلولكم لمشاكل الفلاحة ؟ شنوة تقترحو باش نحدو مالعجز الطاقي ؟ كيفاش باش تحلو مشكلة الماء ؟ كيفاش نوقفو إنزلاق الدينار ؟ شنوة الحل ضد تفشي المخدرات وإدمان الكحول ؟ شنوة حلولكم للبنية التحتية ؟ كيفش نحلو مشكلة حوادث الطرقات ؟ شنوة نعملو ضد التهريب والتجارة الموازية ؟ كيفاش نحدو مالتهرب الضريبي بحلول عملية موش تبهبير فارغ ؟
المواضيع هذي هي صلب العمل الحزبي ومن واجبنا أننا نجبرو الأحزاب أنهم يخدمو على رواحهم ويقدمولنا نظرتهم للحلول متاع المشاكل هذي… يوسف الشاهد سارق وفاشل وتابع اللوبيات والمافيات أوكي صحيتك إي وبعد إنت شنوة تقترح حلول لمشاكل البلاد… أعطيني نحب نسمعك… حدثني على روحك وأفكارك وحلولك.