رفيق عبد السلام ومليار الهبة الصينية
المأساة في تونس، انو المواقف تتبنى على الانتماء الحزبي، موش على مصلحة البلاد، والحكايات الي تأخذ صيت وتعمل بوز ما يهمش صحيحة أو غالطة مادامها تأدي إلى مهاجمة توجه أو قيادي من حزب آخر… حكاية المليار الصيني ورفيق عبد السلام مثال من الأمثلة… قعدت تتعاود وتتكرر رغم انو الحقيقة لا علاقة لها بالواقع، وكل ما يرجع حديث على الفساد يتجبد الراجل وتقوم عليه حملة كالعادة… ما يهمنيش فيه وفي افكارو، ما يهمنيش في توجهاتو، أما الصدق يا رسول الله، خلي الحقيقة برك توصل للناس… وعلى هامش الحرب على الفساد الي أعلنها الشاهد الجمعة هذي، وعودة الحديث على الفساد كبوز اللحظة، رجعت غناية المليار ورجع المليار… احنا كنا بينا هون من جانفي 2016 انو الحكاية بيدونة ولا فيها لا سرقة لا والو.
دائرة الحسابات حققت في الحكاية، وفي تقريرها عدد 28 في الصفحات 123 و 124 قالت بوضوح أولا انو بعد ما الصينيين طلبوا ترك الهبة سرية، وزارة الخارجية بعثتلهم رقم حساب الوزارة في الشركة التونسية للبنك، والفلوس تصبو اذا، موش في حساب رفيق عبد السلام، وإنما في حساب وزارة الخارجية في الـ STB، حساب اسمو “خارجية خاص”…
باهي، هوني دائرة الحسابات تقول انو الإجراء هذا مخالف لقانون الميزانية، وانو الفلوس كانت تنجم تتصب في حساب الخزينة العامة للبلاد التونسية، وتقعد سرية رغم ذلك…
دائرة الحسابات تقول زادا انو في 25 أكتوبر 2012، وزير المالية بعث مراسلة لوزير الخارجية يطالبو فيها بإصلاح المخالفة، وتحويل الفلوس من حساب وزارة الخارجية في الـ STB إلى الخزينة العامة للبلاد التونسية، وبالطبيعة الفلوس باش يقعدو تحت تصرف وزارة الخارجية حتى وهوما في حساب الخزينة العامة للبلاد التونسية، خاطرهم فلوس مخصصين لتنظيم منتدى الصداقة الصيني العربي…
دائرة الحسابات ثبتت في تطور الحكاية ولقات انو بالفعل، تم تحويل كل أموال الهبة الصينية من حساب وزارة الخارجية في الـ STB إلى حساب الخزينة العامة للبلاد التونسية، والتحويل تم بتاريخ 31 ديسمبر 2012.
والي يحب يثبت علينا، يمشي لـ موقع دائرة الحسابات ويحل التقرير 28 ويمشي للصفحات 123 و 124.
وكيما حكينا لفوق، الحكاية موش مربوطة برفيق عبد السلام، فما ضد الجهة الاخرى تشويهات وأكاذيب مهولة حول الفساد، كنا فضحنا العديد منها، وفما شكون متقلق من حرب الشاهد على المهربين فقط خاطرو موش من حزبو، وديما الهدف متاع ناشري الأكاذيب المؤامراتية هو تغليط الناس وجعلهم يكرهون الآخر… الماكينة الفايسبوكية جبارة بصراحة وانا عاجز أمامها.