الجمعة 14 فبراير 2025

حكمت التلفزة حضوريا…

الحبيب حمام
بالله قلّي، فين وصلت في هاك القضية متاع طبّة الأرض؟
ـ ما زلنا نجريوا ونلهطوا، ماكش تشوف فيّ، كرطابتي تحتي، هاذا ملف باش نهزو للمحامي، وغدوى نصبّح معاه في المحكمة
ـ الابتدائية وإلا الاستئناف وإلا التعقيب؟
ـ لا، محكمة نسمة.
ـ آبي، كيفاش هذي؟
ـ ما هي المحاكمات في البلاتوات ولات.
ـ يعني نهار آخر باش يقولوا: رفعت الجلسة للتشاور ولفاصل إشهاري.
ـ إمالى، مريم بالقاضي تراجع ها الأيامات في أحكام الطلاق.
ـ أوخي، باش تقولنا: حكمت التلفزة حضوريا بإلزام المدعو عمار بن نور الدين بالنفقة إلى بلوغ القاصر سن الرشد؟
ـ سامي الفهري مُهتم بالأحكام الجنائية، البارح كان أحمد صواب يعلّم فيه، يعني الفهري قاضي سطاجير، متربص يعني.
ـ وأنا نقول فاش يحكي البارح القاضي أحمد صواب في البلاتو.
ـ أيه، كان يعلم فيه في أحكام التشاجر بالتجمهر الذي أدّى إلى الموت حسب الفصل 200 وشويه.
ـ بالله قلّي، عندي نسيبي عندو بنتو مقيمة في الخارج، تحب اطلع بطاقة تعريف.
ـ أيْوَه نسمع فيك.
ـ غالطين ليها في الإسم، المضمون يخرج غالط.
ـ يلزمها حكم من المحكمة، ما فيش كلام.
ـ نسمة وإلا حنبعل وإلا التونسية وإلا الحوار؟
ـ لا ميش اختصاصهم، هذي المحكمة الابتدائية دائرة تونس أربعة.
ـ باهي، جاري عندو كَتْب، يحب يطلعو من المحكمة، صداق قديم، ضيّع النسخة الاصلية.
ـ لا، هذي من المحكمة الابتدائية بمنوبة، المحاكم التلفزية الكل اختصاص اغتيالات وقتل ونهضة ومرزوقي وطلاق وخراب بيوت، موش زواج وبناء أسر.
ـ حتى أنا قلت.


اكتشاف المزيد من تدوينات

اشترك للحصول على أحدث التدوينات المرسلة إلى بريدك الإلكتروني.

شاهد أيضاً

المشهد حاليا عبثي وينتظر أن يكون أكثر عبثيا في المستقبل

الحبيب حمام تونس تسير بالسرعة القصوى نحو المجهول. قد يقول قائل “لمَ تقول هذا؟ أنت …

قسيس منكود الحظ

الحبيب حمام اجتمع أهل القرية حول حدث طريف، فاستغل القسيس هذه المناسبة الإعلامية، فصعد على …

اترك رد