عبد القادر الونيسي
تحية تليق بمقامكم.
أعتذر لجنابكم على ردود الفعل من خاوتك التوانسة التي إتسمت بشيء من قلة الفهم.
ما فهموش معنى حديثك أن سيادتك مستعد تتدخل في تونس لمقاومة الإرهاب وإستعملت ألفاظا قبيحة لا تليق برئيس دولة.
خاوتك التوانسة ما فهموش آش تقصد بالإرهاب وهم الشعب الذي قضى على داعش في ملحمة بنقردان.
الحمد لله أنا فهمتك وفهمت آش تقصد على خاطر الإرهاب الذي على حدودنا معاكم والحمدلله إنتصرنا عليه كيف كيف بفضل الله ثم بشعبنا ونعرفو من وراءه.
أنا فهمتك سيد الرئيس.
لأنو كل واحد والإرهاب متاعو وكلمة إرهاب جاية من فعل أرهبه معناه أخافه.
وأنت سي تبون الخوف متاعك أنت وأمثالك هي الحرية وهي الإرهاب بالنسبة ليكم وأنا فهمتك من الأول.
مش سي شنقريحة بعدما خرج الشعب الجزائري للشارع في أطول إنتفاضة عرفها العالم رافعين “بغينا نولو كي تونس”
جاوبهم قالهم “تونس باش تولي كيفكم”
وعملتو في تونس كيما حبيتو أنتم والجماعة متاعنا.
اليوم كيف حسيتو موجة الحرية رجعت سميتوها إرهاب وبحول الله المرة هاذي سينفتح باب الحرية علينا وعلى الشقيقة الكبرى وأتمنى من الله أن تستوعبوا الدرس.
نحنا شعب لا نمن على أحد وعمرنا ما قلنا عند محن الجارتين الشرقية والغربية إنا قسمنا معهم كل ما نملك.
تعرف علاش:
ربما الجزائر هي الأخت الكبرى في الجغرافيا لكن تونس هي أم الغرب الإسلامي في التاريخ والأم عمرها ما تمن على صغارها.
نختم سامحني طولت عليك عمي تبون الجزائر عزيزة علينا وأنا الوالد رحمه الله كان يوصل في السلاح عن طريق الصحراء لجيش التحرير.
ما نعرفش أنت وين كنت وقتها أما أنا نعرف بابا وين كان.
والسلام على من إتبع الهدى.
