إنت تعرف مصالحها تونس أكثر مالحكومة

عبد اللطيف علوي 

قبل، في مثل هذا الغرغور وفي غيره من الغراغير، كان وقتلّي يرقد بابا تبكش النّاس الكلّ!
أيلا نعم صغار وكبار، النّاس الكلّ تقطع النّفس!
حتّى الكلاب نسكّتوها أصل، وطير الدّجاج اللّي يعوعش في الحوش ولاّ قريب مالشّبّاك لا ينجو من شلاكة ارتداديه نصف طائره تبعده عشرات الأمتار بعيدا على المراح.
الصّغار بطبيعتنا، حافظين درسنا، يا نتكبّوا تحت تهديد السّلاح (الشّلاكه)، يا نسلّوا أرواحنا ونمشوا للجنان بعيد، نقيّلوا تحت الكرمه قريب للعين، نبدّعوا البدع اللّي خلقها ربّي الكلّ، تحت 80 سخانه ولا على بالنا! الشّيطان يبدى مڨعمز للظّلّ يتبرّد، واحنا نبداو نحادفوا فيه بالحجر.
الشّعب التّونسيّ من حقّه باش يرقد على راحته، ما يقلّقه حد وما يكسّرله نومه حد!
تعب، فدّ!
نوّاب العشريّه الكِخّه، عشريّة الكَكّا، النّهار الكلّ وهم يتعاركوا! هاي اتّفاقيّة درا شنيّه! هاو كلمه هنا ماعجباتوش! هاو فاصل غادي يلزم يتبدّل! قال شنوّه فيه خطر على مصالح تونس والمعنى يتبدّل!
تي يتبدّل المعنى ولاّ يتّخذ! آش يهمّك في جد والديه! ومصالح آش اللّي تحكي على جدّ بوها! إنت تعرف مصالحها تونس أكثر مالحكومة ومالسيد الرّئيس ومن رياض قراد!
ياااسر كانت تاعبه العباد مالنّواب متع العشرية الكحلا، يتعاركوا على حاجات فارغه، والشّعب يحبّ يرقد ومن حقّه باش يرقد!
الحمد للّه!
اليوم كلّ شيء رجع مريڨل! وارتحنا من شواطن الڨايله! اللّي لا يرقدوا لا يخلّوا الشّعب يرقد!
قبل كنّا نبعثوهم يقيّلوا في الڨرعه اليوم نبعثوهم يصيّفوا ويشتّوا في المرناڨيّه!
الحمد للّه! وتحيا الجمايليّه!
كلّنا الجمايليّه!

النص الكامل مذكرة تفاهم بين تونس و أوروبا حول الهجرة