fbpx
الإثنين , 27 سبتمبر 2021

“النّوع اللّي غلّب عليّ” 😝

الخال عمار جماعي 

كيف تكون ولد الطبقة الوسطى عشت طفولة بألعاب البراعة اليدوية باش ما تمسّش التراب.. وأمّك كانت توصّل فيك للمدرسة.. وقريت الابتدائي عند ميسيو ومادام.. وكنت تشارك في الرحلات لطبرقة وعين دراهم و توصف الربيع في الإنشاء متاعك.. وتقعد بحذا بنيّة مزيانة باباها يخدم في بانكة..

وتكبر شوية تدخل الليسي ويوصّي عليك باباك القيّم العام.. وين يصير اضراب يقولك برّه روّح لداركم.. تلبس لبسة نظيفة و تصاحب بنيّة مراهقة كيفك.. تقعد في الطاولة الوسطانية وتعدّي أمورك مرّة بالجهد مرّة بالفوسكة.. تاخذ الباك بملاحظة متوسّط جدّا.. وتمشي للجامعة تشيخ بحفلات الرقيص.. تسلّكها وتنجح و تخدم.. تاخذلك أمّك مرا وتبنيلك فوق داركم.. وتجيب صغار تسميهم أسامي شيك.. وتحضر معاهم في حفلة الروضة متاع أنيستي.. ماتحبّش تقعد في القهاوي الشعبية وتحكي كان مع زملاء الخدمة.. تتبع الكورة و البطولات الأوروبية وتعرف أسامي الملاعبية الكل…

في عمرك هذا دخلت مرة وحدة لمركز شرطة باش تطلّع بطاقة تعريف.. حتي مرة ما وقّفك بوليس لأنك مواطن منضبط.. حتى مرّة ما كليت كفّ لأنك تخاف من الحاكم و تهرب من المشاكل.. عمرك ما تهنتلت لأنك ما كنتش محتاج شي .. عمرك ما جبدت سياسة ولا قضية و فلسطين تسمع بيها كان في الأخبار.. الجريدة تبداها من تالي تقرا كان أخبار الكورة..

وجات “الثورة”.. ما فهمتش شنية الحكاية وعلاش؟ ما عرفتش علاش العباد تكسّر في مراكز الشرطة وتسبّ في الحاكم؟ ما لقيتش بعدها باش تفتخر قدام المناضلين اللي عمرك ما سمعت بيهم..
عرفت الفايسبوك وحلّيت صفحة باش “تساهم بآرائك النيّرة”.. ماعادش خايف.. تنجم تقول إلّي تحبّ مادام “حرية التعبير مكفولة بالدستور”.. تضرب أخماسك في سداسك وتتبيّن أنّ ها “الثورة” متاع وذني هنتلاتك وفضحاتك وبيّنت أنّك تافه وفارغ وما جيت شي.. ساعتها تبدا تسبّ فيها وفي المناضلين وتصفّق لعبير وتسبّ في الخوانجية وتتضومر تضومير ماسط لاسط كيفك!
ها النّوع هذا هو اللّي غلّب عليّ 😜

“الخال”

شاهد أيضاً

الأحزاب القمّامة (بتفخيم الميم المشدّدة)

الخال عمار جماعي  [فاصل معجمي قبل الدخول إلى الموضوع : تُطلق صفة “القمّام” أو “آكل …

الحمد لله على نظام “غير رئاسي”!

الخال عمار جماعي  ماذا يريد الحاكم بأمره في قرطاج من هذه القنابل الدخانية التي يلقيها …

اترك رد