العراف التونسي كيف يعطينا تكهناته

الحبيب حمام 

العراف التونسي كيف يعطينا تكهناته: عام 2021 باش تقع فيه برشه حاجات

• باش يكون فيه 12 شهر.
• باش تنتشر فيه كورونا وباش يموتوا برشه ناس.
• باش تصب المطر في أوقات وما تصبش فيه في أوقات أخرى.
• باش يموت فنان.
• باش تموت شخصية عالمية.
• وتارزي.
• وزوز حجامة.
• وثلاثة جزارة.
• ولاعب كورة مشهور.
• طياب حمام باش يزلق وتسبب ليه أضرار جسدية.
• عادل إمام باش يموت في عام 2021 وإلا من بعد.
• الاقتصاد التونسي باش يتفرهد، وكان ما تفرهدش تغلى الأسعار.

البلورة تقول أنه:

• فمه أيام باش يكون فيها الليل طويل وبارد وناس يموتوا في هاك الليالي.
• وفمه أيام سخانه برشه وناس يموتوا في هاك الأيام.
• فمه ناس باش تلقى خدم وناس باش تطلع بطالة.
• فمه زرع باش يكون فيه صابة وزرع آخر الله غالب.
• نتائج الباكالوريا باش يكون فيها متفوقين وباش توصل بعض المعدات فوق 19/20.

تقول البلورة في الشأن الدولي:

• باش يقع تطبيع مع إسرائيل من طرف بعض البلدان.
• أمريكا باش تدعم إسرائيل.
• مشاكل باش تقع في فرنسا.
• البطالة باش تزيد في العالم.
• الصين باش يقع فيها حدث كبير.
• بلد إفريقي باش تقع فيه اضطرابات سياسية.
• في موريتانيا باش تجي أيامات فيها اضطراب، أقلها البحر في اضطراب.
• البورصة العالمية باش تكون متذبذبة، طالعة هابطة.

تقول البلورة على صعيد الكون:

• هناك كوكب باش يقترب من المجموعة الشمسية.
• هناك ثقب سوداء باش تبتلع بعض النجوم.
• باش تقع تكتلات غازية وتنشئ بعض النجوم.
• هناك كواكب باش يتغير مدارها.
• يوم الخميس باش يواصل يجي بعد يوم الأربعاء.