fbpx
الثلاثاء , 19 يناير 2021

قدّاش تسلّفنا بعد الثّورة ؟

الإقتصاد بالفلاقي

قدّاش تسلّفنا بعد الثّورة، و قدّاش جاتنا هبات، و شنوّا عملنا بيهم… 80 مليار دينار؟ ميات مليار دينار؟ ضاعت؟ تبخرت؟ هات نثبتو بالتفصيل ونفهمو كل تفصيل
نوّاب لجنة الماليّة بمجلس نوّاب الشّعب، بعثو مؤخّرا رسالة لوزارة الماليّة يسألو فيها، شنوّا عملتي بالفلوس الّي تسلّفتيهم…

هات نشوفو شنوّا صار 2011 الى 2019…

  • أوّلا، نشوفو قدّاش لمّينا ضرائب من الشّعب التّونسي أفراد وشركات؟
    من 2011 الى 2019، الشّعب التّونسي أفراد وشركات دفعوا ضرائب يقيمة 176,6 مليار دينار.
  • ثانيا، قدّاش لمّينا من مداخيل جايّة من أرباح الحارة مؤسّسات عموميّة الرّابحة، ومداخيل أتاوات النّفط، وأتاوة عبور أنبوب الغاز الجزائري، ومداخيل المصادرة والخوصصة، والشركات الحكومية الي ماخذة قروض من الدّولة وخلصتهم، يعني السؤال هو قدّاش لمّينا من المداخيل غير الجبائيّة؟
    من 2011 الى 2019، المداخيل غير الجبائية لتونس بلغت 24 مليار دينار…

كي نجمعو اوّلا وثانيا، نلقاو مجموع امكانيّاتنا الذّاتيّة في التّسعة سنين من 2011 الى 2019. والمجموع هذا يطلع 200,6 مليار دينار… يعني احنا جمعنا موارد ذاتيّة بقيمة 200,6 مليار دينار… هات نشوفو قدّاش مصاريفنا في الـ تسعة سنين هذوكم…

• أوّل مصروف صرفناه، هو أجور موظّفي وعملة الدّولة، وفي التّسعة سنين، الشّعب التّونسي دفع ما قيمتو 107,5 مليار دينار أجور لموظّفي وعملة الدّولة… (ما تستغربوش من الرّقم، عندنا حوالي معدّل 650 الف موظّف، كي تقسمو الـ107,5 مليار على 9 سنين، و الي تلقاووه تقسموه على 650 ألف موظّف، تلقاو معدّل الأجر للموظّف الواحد في العام، أقسموه على 12، تلقاو انّو الأجر الخام للموظّف شهريّا في حدود معدّل 1531 دينار، نحّيو منهم قصاصات ضمان اجتماعي و ضرائب و مساهمة المشغّل في الضّمان الاجتماعي (حوالي 40% من الاجر الخام) تلقاو معدّل اجر (نعاود معدّل هذا) الموظّف هو 918 دينار شهريّا… شفتو كيفاه هاك الـ107 مليار دينار الخرافيّة كيفاه تتلقّط بالفليّس بالفليّس…

باهي قلنا عندنا 200,6 مليار دينار صرفنا منهم 107,5 مليار دينار أجور موظّفي وعملة الدّولة، قعد في يدّينا 93,1 مليار دينار، وفي المصروف؟ لا مازال…

• ثاني مصروف عندنا، هو الدّعم، والتدخّلات للعائلات المعوزة، ومساعدة الصّناديق الاجتماعيّة للتّقاعد، و مصاريف الانتخابات المختلفة… احنا في الـ9 سنين صرفنا على الحكايات هذي 51,9 مليار دينار، بمعدّل 5,8 مليار دينار سنويّا (عام 2019، صرفنا 7,8 مليار دينار على الحكايات هذي، منهم 4,8 مليار دينار وحدهم لدعم المحروقات والموادّ الغذائيّة والنّقل)

باهي قلنا في يدّينا 93,1 مليار دينار، زدنا صرفنا منهم 51,1 مليار دينار دعم وتدخّلات اجتماعية، قعد في يدّينا 41,2 مليار دينار، وفى المصروف؟ لا مازال…

• ثالثا، عندنا مصاريف تسيير الإدارة التّونسيّة، ضوء و ماء و تلفون و كراوات و أوراق و محروقات و تصليح للبنايات و التّجهيزات و غيرهم من مصاريف التّسيير و الصّيانة… احنا في الـ9 سنين صرفنا على الحكايات هذي 9,7 مليار دينار…

دونك، كانوا قاعدين في يدّينا 41,2 مليار دينار، زدنا صرفنا منهم 9,7 مليار مصاريف تسيير الإدارة التّونسيّة، قعد في يدّينا 31,5 مليار دينار، وفى المصروف؟ لا مازال…

• رابع مصروف عندنا، هو مصاريف التّنمية و الاستثمار (كيّاسات و قناطر و مدارس و مستشفيات و تجهيزات ثقيلة و غيرهم)… احنا في الـ9 سنين صرفنا على الحكايات هذي 48,1 مليار دينار…

نواصلو الحسبة إذا، كانوا قاعدين في يدّينا 31,5 مليار دينار، زدنا مصاريف تنمية بـ 48,1 مليار دينار… و هكّا ما قعد في يدّينا شي، ومن فوق مسالين في 16,6 مليار دينار، وفاشي المصروف على الأقلّ؟ لا لا، مازال…

• خامس مصروف عندنا، هو مصروف تسديد الدّيون القديمة، احنا كلّ عام عندنا أقساط ديون (خذيناها في الأعوام الي قبلو) و يجي وقت خلاصها عامتها، أحنا في التسعة سنين من 2011 الى 2019، خلّصنا أقساط ديون بقيمة 51,7 مليار دينار (34,4 اصل و 17,3 فوائد) …

نجيو للحسبة الأخيرة توّا..

احنا قبل الدّيون داخلة او خارجة، وحدنا وحدنا، في الـ 9 سنين من 2011 الى 2019، صرفنا فوق طاقتنا 16,6 مليار دينار… وهاذم بالطبيعة لازم نتسلفوهم… لكن باش نلقاو شكون يسلّفنا ديما، لازم نكونو مخلصين ونخلصو القديم في وقتو، خلاص القديم طلع 51,6 مليار دينار… يعني احنا عندنا حفرة بـ 68,2 مليار دينار (16,6+51,6)… شنوّا الحلّ باش نغطّيوها؟ مشينا في هاك الـ 9 سنين، تسلّفنا 66 مليار دينار جديدة ودبّرنا يا كريم متاع اللّه هبات (من الإتّحاد الأوروبي أساسا) بـ 2,2 مليار دينار… وبالطّريقة هذي غطّينا كلّ مصاريفنا من 2011 الى 2019… ويعمل اللّه في الأعوام الجايّة توّ صغيراتنا يخلصو الدّيون الّي خذيناهم… علاش صرفنا أكثر من طاقتنا برشا بعد الثّورة باش نتورّطو للدّرجة هذي؟ هذا موش موضوعنا اليوم…

الخلاصة في موضوع آش عملنا بالدّيون والهبات:

أحنا من عام 2011 الى 2019، دبّرنا ديون وهبات بقيمة 68,2 مليار دينار، صرفنا منهم 51,6 مليار دينار باش خلّصنا أقساط الدّيون الّي جاء وقت خلاصها كل عام من الأعوام التّسعة، واستعملنا 16,6 مليار دينار باش غطّينا الفارق بين مصاريفنا ومداخيلنا… هذي إجابة أولى لسؤال نوّاب لجنة الماليّة لوزارة الماليّة…

السّادة النّوّاب الي يحبّو يثبتو في المصاريف بالباب بالباب من أبواب الميزانيّة الي حكينا عليهم لفوق، نقلهم راهو قضاة محكمة الحسابات كل عام يثبتوا ويقدمولكم تقرير مفصّل جدّا على طريقة صرف الميزانيّة في كلّ باب وكلّ عنوان وكل جزء، وكلّ عام بعد ما يجيكم هاك التّقرير، تصادقوا على قانون اسمو قانون غلق الميزانية الي فيه فاش تصرفت الموارد الذّاتيّة والدّيون الي خذيناها…

أخيرا الي يحبّ يثبّت في الأرقام، عليه بالرّابط هذا:

http://www.finances.gov.tn/fr/les-indicateurs/ressources

وردّو بالكم، لازم تحينو 2019 حسب قانون الماليّة التّكميلي، وتزيدو مصاريف القروض المحالة في مصاريف التّنمية، وتخلطو فواضل أو ناقص السنة على السّنة الي بعدها، باش تجيبو الأرقام الصحيحة…

•••

جدول ملخص 2011 إلى 2019

مداخيل: 200,6 مليار دينار.

  • مداخيل جبائية: 176,6 مليار دينار.
  • مداخيل غير الجبائية: 24 مليار دينار.

مصاريف: 217.2 مليار دينار.

  1. أجور موظّفي وعملة الدّولة: 107,5 مليار دينار. 
  2. الدّعم: 51,9 مليار دينار.
  3. تسيير الإدارة: 9,7 مليار دينار.
  4. التّنمية والاستثمار: 48,1 مليار دينار.
  5. تسديد الدّيون القديمة: 51,7 مليار دينار.

العجز: 16,6 مليار دينار.

ديون وهبات: 68,2 مليار دينار.

  1. أقساط الدّيون القديمة: 51,6 مليار دينار.
  2. الفارق بين المصاريف والمداخيل: 16,6 مليار دينار.

اترك رد