الحاج الصيفي والمُعمر موريس والڨومي بربوشة

نصر الدين السويلمي

هيا نحكوا على الحاج الصيفي والمُعمر موريس والڨومي بربوشة
ثم ارقام قاعدة تدور الآن على وسائل الاعلام حول مرحلة الترويكا ومقارنتها بالمراحل الاخرى، تبين ضعف كبير عند الترويكا، مقابل ازدهار في المراحل الأخرى! الامر هذا موش كان في الاقتصاد حتى في عمليات سيغما وسبر الآراء، يقدم الزرقوني الأرقام الصحيحة أما منزوعة من سياقها، تزيد وسائل الإعلام تعبث بالأرقام تڨلعها من سياقها وترد السلبي ايجابي والعكس بالعكس.

موش لأني نفهم اكثر منك اخي الناشط اختي الناشطة، لا ابدا.. فقط لأنك انت اختصاصك حاجة اخرى ما عندكش وقت باش تبع الشقيقة والرقيقة وتلاحق ارقامهم ومعلوماتهم وتقارن وتغربل، وبما اني مختص في الاعلام والمسائل هذي تقع تحت المتابعة اليومية، هات انا ننفعك في المجال هذا وانت تنفعني في مجال اختصاصك الرياضي مثلا واختنا الطبيبة تنفعنا في مجال الطب، هكا نتكاملوا ونكونوا قوة متاع اولاد حلال ما يعدوهاش علينا ولاد لحرام.
باهي هات نبسطوا الأمر مع شخصيات افتراضية، الي هي الحاج الصيفي والمُعمر موريس والڨومي بربوشة.
هذوما يسكنوا في منطقة وحدة وعندهم مزارع مختلفة، جاء اعلام العار ومؤسسات العار تحب تعمل اشهار لموريس وبربوشة وتشوه الحاج الصيفي! ياخي نشروا دراسة قدموا فيها المعطيات التالية:

• تربية الدواجن
  المعمر موريس 70%
  الڨومي بربوشة 28%
  الحاج الصيفي 02%
• تربية الماعز
  المعمر موريس 68%
  الڨومي بربوشة 31%
  الحاج الصيفي 01%
• تربية الفئران
  الحاج الصيفي 98%
  الڨومي بربوشة 02%
  المعمر موريس 0%

تسمع الناس الكل الي المُعمر والڨومي هوما الي ناجحين وصالحين، وينفعوا في الوطن وانو الحاج الصفي فاشل ما نجح كان في الفيران.. مع الوقت ماعادش ينادولو الحاج الصيفي، يولوا ينادولوا يـــا متاع الفيران!!!!
باهي كي نڨلعوا نحن اعلام العار ومؤسسات العار، ونغسلوا بلايصهم 7 مرات بالتراب، وبعد نصبوا عليها الجفال، ونجيبوا اعلام نزيه ومؤسسات نزيهة، شنو يعطونا؟ أكيد يعطونا الحقيقة الي هي بسيطة.
هات عطينا الحقيقة نشدوا بيها يدينا حتى يسهل ربي ونڨلعوا الطاعون.
أيا سيدي الحاج الصيفي ماهوش فاشل في تربية الدجاج، لانو غارس نباتات صحية وثمينة ومهمة يتعامل مع مخبر للادوية، النباتات هذي ما يسعادهاش الدجاج، يولي الحاج يربي 3 او 4 دجيجات على العظام العربي للذري.. يجي اعلام العار ومؤسسات العار يتجاهلوا مشروع المخبر والنباتات الي موش موجودة في بلادنا ويركزوا على الزرڨطون!
هي والمعيز!
الحاج الصيفي الاسطبل متاعوا معبي بالبقر، على هذاك ما جبدوش سيرة البقر، لانو الحاج مهيمن على السوق بنسبة100% هو والعائلة كاملة يخدموا ليل ونهار، ما عندهمش وقت، بالنسبة للمعمر والڨومي مربين المعيز واكثرها جدعان لا ولادة لا حليب، يسيبوها على زواتين الناي بالغورة ويمشوا يعدوا نهارهم من سفارة لسفارة، ومن تكنبيصة لتكنبيصة.
باهي فهمنا والفيران! تو الحاج بعقلوا والا بلا عقل؟!
الفيران يا سيدي اتفاقية بين الحاج الصيفي ومعهد الأورام السرطانية، الفار الابيض الي يجيبوا المخبر التونسي من برّا بــ 200 إلى 300 يويو، نربوه هنا ونشرحوه هنا وزيتنا في دڨيڨنا.. فهمتو ؟!
أي باهي مالا علاش ما عطوش على بقر ونباتات ومخابر الحاج الصيفي لا في التلفزة لا في الراديون لا ڨالتها الجريدة؟
لا عــــاد!!! لا لا.. رجعت بي للشيخ الي قرا الطفلة 20 سنة توحيد وعقيدة وفي الاخير قاتلوا سيدي الشيخ منوبية واش تكون من ربي!