عادل بن عبد الله
الدعاء هذا ما يقبلش النقاش متاع الأصناف هاذي:
- اللي يتصورو أنو الصلاة جابها الإسلام السياسي موش فريضة من فرائض الإسلام (وبالنسبة ليهم أي متدين مشبوه حتى تثبت الاستقامة متاعو على مذهب النمط، ويعطوه فقهاء النمط شهادة الوطنية).
- الناس اللي يتصورو أنو الرئيس ما يكون حداثي وتقدمي الا اذا شافوه في جلسة خمرية، والا هو خوانجي والا حداثي مشكوك فيه.
- الناس اللي يتصورو أنو التدين انحياز للاسلام السياسي وحوش انحياز لهوية الشعب.
- الناس اللي كانوا مصدقين صالح الحاجة وقت حط تصوير بن علي وهو يدعي في الحج وكتب تحتها: “إنه يدعو لنا”.
- الناس اللي عندها مشكلة مع أي شكل من أشكال التدين ويحبو رئيس يمارس “الإلحاد الوظيفي”.
- الناس اللي كانوا يقبلوا انو بن علي وبورقيبة يصليو ليلة 27 رمضان وهوما ما يصليوش أصلا، ويعتبرو هذاكه داخل في باب “الرعاية الموصولة” متاع الرؤساء بالدين الإسلامي، يعني الناس اللي على مذهب “صلاة القياد مواسم وأعياد”.
- الناس اللي باش يحلو مندبة على مدنية الدولة وحيادية الإدارة والنمط المجتمعي، واللي يتصورو انو الإنسان ما يكون “تونسي أصيل” الا وقت يحكي بمنطق بوغلاب “حاناتنا خير من مساجدكم”.
- الناس اللي تفهم في الدعاء متاعي نوع من التلحيس (واذا ساء فعل المرء، ساءت ظنونه)، موش رسالة مضمونة الوصول لهاكه الدعاوي الفارغة اللي ما يعرفو من الحداثة كان الارتزاق بشوية كلام كبير (حولوه بالتفاهة متاعهم الى كبائر كيما يقول صديقي الأمين البوعزيزي) وما يعرفو من الدين كان الحضرة والسلامية وتراب تونس السخون.