النضال النقابي تباع للشُّعب المهنية متاع التجمع !!!

الأمين البوعزيزي
• هيه عاد كمل حكايتك؛ صبيت جام غضبك على الانحراف النقابجي اللي كمل على مرمة تخريب القطاع العمومي المختطف على أيدي كفاءات سبعة نوفمبر الممنوع محاسبتهم لأن الثورة حاقدة على كفاءات الدولة الوطنية اللي يقلك بناو البلاد!!!
شوف سيدي خويا:
– لو لا النضال النقابي بقيادة الاتحاد؛ الحكومة باش تبيع كل شيء للخواص السماسرة المحليين وشركاؤكم العولميون… التعليم والصحة والصناعة والفلاحة والماء والكهرباء والنقل العمومي والمطارات… لكن النضال النقابي تباع للشُّعب المهنية متاع التجمع!!!
– كيفاش؛ يظهر فيك وليت تهز وتسبط حتى أنت؟؟!!
– لا لا وسع بالك معايا توة تفهم… ماهو بعد 23 أكتوبر 2011 بعد الإنتخابات تغير المشهد السياسي الحاكم وأصبحت النهضة في الحكم بشراكة زوز أحزاب علمانية… عاد هاك “اليسار” الستالينجي اللي يعتبر روحو التقدمي الوحيد في البلاد واللي يخل فمو معاه يقولولو يا خوانجي… فكر حزر شغل مخو وقال: لابد من الإطاحة بالخلافة العثمانية والامبريالية القطرية اللي احتلوا البلاد بالخوانجية والأحزاب الطرطورية ويلزم حل لتحرير تونس… عاد كانت الفتوى: مادام الأحزاب التقدمجية ضعيفة يلزم نخدّمو ماكينة الاتحاد… وهكاكة سمحوا لفلول الشعب المهنية المنحلة بتشكيل نقابجات كالفِطر… وهكاكة ولينا حك رأسك وأعمل إضراب… الإدارات ولت رعب في رعب… تسيب في تسيب… وأي مسؤول عندو ضمير يولي خوانجي حتى لو كان ماركسي لينيني… موش مشكل نطلعولو حكاية ونقولو عليه باع الطرح وشراووه الخوانجية… وهكاكة تبرك البلاد بإسم الثورة النقابجية على شاكلة الثورة الثقافية الماوية آك العام في الصين الشعبية…
ويصبح أي مشروع هو مووووؤامرة خوانجية تدعم فيها الخلافة العثمانية والإمبريالية القطرية… ويصبح الإضراب العام تتصدره رقاصات “الله أحد بنعلي ما كيفو حد” ونواب برلمان طلبة التجمع سابقا… و”يا غنوشي يا سفاح يا قتال الأرواح” يُرفع عاليا صداح على أفواه أزلام صانع التغيير وهم يخوضون نضالات سنوات الجمر للإطاحة بثورة البرويطة متاع هنري ليفي… ولفّي يا دنيا لفّي…!!!
وهكاكة قطاع النقل يولي في يد الباندية والمطار في يد السراق متاع حقائب المسافرين وملائكة الرحمن يموتو بالجملة في السبيطار… والتلفزة الوطنية ميزانيتها قداش من مليار وتخدم في 1200 ما يخدمو في شيء… ولطفي العماري معلم مهبول بتقرير طبي يخلص من وزارة التربية ويخدم كركنكور خدمتو ترذيل الثورة كل ليلة… وإن شاء الله تونس “تت…..ك” المهم الخوانجية يرجعوا للحبوسات…
يا ولدي يهديكم الرحمن… راهو موش هكة… راهو يلزمنا بناء نظام ديموقراطي يتعايش فيه الجميع… موش بتوافقات بوس خوك المدمرة… لكن نخوض فيه كل الصراعات دون طمس لكن على قاعدة مشتركات وطنية لا تقربوها… موش حرب الكل ضد الكل!!!
هيه باهي باهي؛ رجّعنا للنقابة المخترقة والفساد الإداري المدمر للقطاع العام آش عملنا فيه؟؟؟
مانيش طز حكمة سيدي خويا… آنا شخصت لك الوضع الخربان… والحل نفكرو فيه مع بعضنا إذا قبلتني شريك معاك في البلاد… حتى لو كان جيتها من وراء البلايك كيما قالوا علينا الشلايك…
أول مقترح: تشكيل شبكة #أنصارالقطاعالعامالسيادي في كل إدارة #مرصدمواطني للتجاوزات الإدارية والنقابجية على السواء… مرصد كيما يدافع على حقوق العمال يدافع بشراسة على المرفق العمومي من مخططات التفويت ومن مخططات رزق البيليك… وهكاكة يكون نضالنا مزدوج ضد الخوصصة الإجرامية وعقلية رزق البيليك الإجرامي والبيروقراطية النقابجية الإجرامية… وبرة ربي يخلص وحل هالبلاد من أدعيائها قبل أعدائها…
✍الأمين.