من ورا البلايك وأفتخر

عادل بن عبد الله
من حق رئيسة بلدية باردو انها تفرعن (بما انو التجمعية هاذي “كفلتها” النهضة لانو “التبني” مازال لتو حرام رغم التوافق)، من حق التجمعية-النهضوية هاذي انها تسب الناس اللي من وراء البلايك (وانا منهم لأني نازح)… من حقها تسمعنا ما نكرهو مادام هي جمعت بين الحسنيين، ومادام هي من جماعة “خياركم أزلامكم” على مذهب الشيخين.
العيب والله لا هو فيها (لأنو اللي يخبيه القلب يفضحو اللسان في لحظات الغش)، العيب في اللي حطها غادي (النهضة) والعيب أكثر في اللي انتخبوها رغم ماضيها الأسود (سكان باردو اللي من “ورا البلايك”)
وشخصيا ننتظر من النهضة انو تعمل اعتذار رسمي للناس اللي من ورا البلايك (وهي أغلب قياداتها وقواعدها من ورا البلايك كيفي، لكن مغرومين بالشلايك اللي مازالوا ما يعرفوش انو “ما ثمة بلدي كان الجربوع” لانو مربوط بنظام التصريف الصحي وصعيب يكون جدودو جايين من خارج العاصمة). واذا النهضة ما عملتش اعتذار رسمي، من حق الناس اللي من ورا البلايك اللي كيفي انو يعتبرو صمتها موافقة على منطق رئيسة البلدية ويتعاملو معاها على الأساس هذا.
شكرا للسيد لطفي زيتون القيادي النهضاوي الوحيد اللي فهم خطورة الخطاب الجهوي البائس متاع رئيسة بلدية باردو، شكرا -لأنو مهما اختلفنا مع مواقفو- كان عندو الشجاعة السياسية باش يعتذر باسمو الشخصي ويطالب الحركة متاعو باعتذار رسمي للتوانسة الكل.