رسالة مفتوحة لجهابذة الجبهة الشعبية
النهضة إذا عندها جهاز سري، علاش ما صفّاتش أكبر المجرمين متاع التجمعيين واليساريين اللي عذبوا أولادها وشردوهم وعيشوهم حياة الذل أكثر من عشرين عام ؟ علاش الجهاز السري متاع النهضة ما استغلش المد الثوري بعد 14 جانفي 2011 وصفّى الجلادين والسياسيين اللي الضحايا متاعهم الكل يعرفوهم بالإسم؟ علاش النهضة قبلت باش تحتكم للقضاء مع المجرمين هاذومة وقبلت بحكم القضاء حتى وهو موش في مستوى الجرائم المنسوبة لأسقط ما أنجب نظام المخلوع؟ علاش الجهاز السري متاع النهضة ما تحرك كان في فترة الترويكا، وهو من المفروض ينظفلها الساحة من أعدائها قبل ما تحكم؟ علاش البهامة متاع اليسار الإستئصالي تخليه يستعمل نفس السيناريوهات اللي استعملها بن علي ويتصور أنو العباد ممكن تصدقو، وعلاش لتوا اليسار مازال يفكر بمنطق ستالين وأنور خوجا وبول بوت وكأنو مكلف بمهمة عند عزراييل والصناع متاعو، وزيد ما يحشمش وقت يقول أنو “ديمقراطي” و”تقدمي”؟
المجرم بن علي، بشكون خدم باش يقتل عشرات النهضاويين ويعذب الآلاف ويشردهم ويعيشهم مواطنين درجة عاشرة… موش اليساريين؟ شكون كان في قيادة الآلة القمعية متاع بن علي (الآلات الحزبية والأمنية والثقافية والإعلامية والنقابية)… موش اليساريين؟ شكون دمر البلاد وردها مزرعة عايلية بين علي وأنسابو، موش خرافات الدفاع على النمط المجتمعي اللي دافع عليها اليسار؟
قداش من يساري مات ملي استقلت تونس على يد واحد نهضاوي، وقتاش من تونسي مات على يدين اليساريين في وزارة الداخلية ومراكز الإيقاف وفي الحبوسات؟ قداش من نهضاوي كان جلاد وإلا مرتزق وإلا كلب حراسة إيديولوجية للنظام في عهد بن علي وقداش من يساري؟
مختصر القول: مهما تزايدوا على النهضاويين… التاريخ يشهد أنكم أكبر حليف للأنظمة الإستبدادية، والتاريخ يشهد أنو يديكم ملطخة بالدم وقلوبكم سوداء كيف أفعالكم قبل الثورة وبعدها… ومهما تعلّوا أصواتكم ويكثر الحس متاعكم، في النهاية ماكم إلا طابور خامس في خدمة أسيادكم في المافيات العايلية والجهوية اللي عاملتكم كيف سروال الجندي… كل مدة يلبسو واحد.