البارح سمعت مداخلة النائبة المدعوة.. فاطمة المسدّي في مجلس النواب… مداخلة أقل ما يُقال عنها أنها هابطة… ومعبية بالبهامة والكذب والحقد والتفاهة…
نسمع فيها تحكي مللول ما صدقتش… قلت تحكي بجدها زعمة ؟ والا في اخر المداخلة باش تقوم تضحك وتقول راني نفدلك ؟
اش قالت للّة النايبة ؟ قالت اسمعوا راهو باش تصير أكبر عملية نهب للمال العام.. كيفاش مدام فسرلنا… قالك اكا سهام بن سدرين (ما فماش هيئة الحقيقة و الكرامة) قررت باش تعطي تعويضات بالمليارات للنهضاويين الانتهازيين… و شدت في بقداش كيلو نضال عاودتها وكعررتها تقريبا خمسة مرات…
باهي مدام النايبة.. ايجا هوني نفسرلك… أنت عاملينك كبش نطيح وبلاصتك موش غادي أصلا… اما مش مشكل نفسرلك كي قدر ربي…
أولا : يااا مدام ياخي مش من 2013 و انتوما تندبو على آلاف المليارات الي تصرفت في التعويضات ؟ تي هاك استعرفت وحدك وحدك الي ما صارتش تعويضات قبل وتوة بركة وين تقرر الي باش يصير جبر الضرر للضحايا… هاذي كذبة و رتحنا منها…
ثانيا : يا سسمك منين ليك الي الدولة باش تدفع التعويضات من الميزانية ؟ ياخي انت تعرف تقرى و الا لابسة مرايات تتفزعك بيهم ؟؟ ما شفتش الامر الحكومي عدد 211 لسنة 2018 مؤرخ في 28 فيفري 2018 يتعلق بضبط طرق تنظيم صندوق الكرامة وردّ الاعتبار لضحايا الاستبداد وتسييره وتمويله ؟ و الا شفتو وتفلّم وتكذب على العباد ؟ كان ما شفتوش مصيبة وكان شفتو فضيحة…
اش يقلك الامر يا سسمك… يقلك الي الصندوق باش يقع تمويلو بالاموال المتأتية من تنفيذ القرارات التحكيمية الصادرة عن لجنة التحكيم والمصالحة.. منو فيه زيتو يقليه يعني..
ومن الهبات والتبرعات… وهز يدك من الطبق… لا ميزانية لا الاف المليارات لا سيدي الزكري… علاش الكذب يا مدام ؟؟؟
ثالثا : مادم سيادتك تكعرر وتعاود في بقداش كيلو نضال… ايجا نقلك حاجة صعيبة على مخك الأصفر… بن علي متاعك والنظام البورقيبي الي انت فخورة بيه… كانوا ما يفرقوش بين المناضل وبين المعارض وبين عايلتو وولد حومتو… يعني فمة ناس لا ناضلت ولا انتمات لحتى حركة ولقات روحها تتعذب وتتحاكم وتترمى في الحبوسات… عباد مستقبلها ومستقبل عايلاتها ضاعوا علاش ؟ على خاطر بن علي متاعك كان يستعمل في الدولة باش يعذب ويسجن ويغتصب ويشوه ويضيّق ويهرسل… ومادام الدولة ظالمة… لازم تخلص… والي ناضل قبل في النهضة والي في العمال والا في البيدي بي والا حتى بربع كلمة موش هو المتهم الي باش تحاسبو سيادتك… هو في الاصل من حقو يعبر… اما سيدك بن علي ما يحبش كلمة لا وما تجيش… لذا وبحيث الناس الي كيفك في حزبك ما ينجموش يفهمو.. خاطر أصلا ما عندهمش إنسانية… ما يفهموش شمعناها رحمة… يعرفو كان الكذب والتبلعيط والتبهبير..
رابعا : مدام ايجا ننصحك نصيحة… انت حسب ما شفت كريارك في السياسة اصلا مازلت ماكش فاهمة روحك… كنت في النداء…خرجت من النداء مشيت للمشروع… ومن بعد خرجت من المشروع رجعت للنداء… ومن بعد خرجت من النداء قعدت وحدك شوية ومن بعد رجعت للنداء… ننصحك تشوف طبيب نفسي… وتعمل جلسات وراء بعضهم باش تفهم روحك.. بااااااالكشي في مرحلة متقدمة من العلاج تولي تفهم شمعناها نضال وعدالة إنتقالية واستبداد و و و… ومدامني متفكر تعلّم أقرى وطالع شوية… عيب نايبة ما تقراش القوانين والأوامر…
كهو توة تنجم تذهب..
