أيا سيدي نفختولي الكاريزما وماعاش عندي وسع بال على الجهل المكدّس اللي خنقني من نهارت حادثة قرقنة:
تعرفو شنوة الفرق بين اللي حبوا يحرقوا وماتوا، وبين اللي ينبروا عليهم ويقولوا البلاد فيها خدمة وهوما “يحبوا اللقمة الباردة” ما يحبوش يخدموا واللوم على أهلهم مش عليهم؟؟؟
• الفرق اللي النبّار عندو salaire قريب الألف ونص ومرتو ingénieur في حين أنو وخينا عامل بحضيرة ياخذ 400 راس الشهر..
• الفرق أنو ما يعرش هالـ400 يصرفهم ولا يصرف منهم 100 ويعطي 100 لامو و100 يشري بيهم مريول ويخبي 100 ولا يصرفهم الكل ويرتاح ولا شيعمل بالضبط!! مع التذكير أنو الـexpress ولات بـ800 في قهاوي الحومة، أي presque 1% مالـ100 ألف المخصصة للمصروف..
• الفرق انو النبّار يهز صاحبتو كل يوم ويمشي لـoxford في اللاك 2 يشرب ديراكت بـ9 آلاف، في حين أنو وخينا في الحامّة راكش في قهوة “العهد الجديد” هو و6 اصحابو بطالة على cappucin وحدة وكل واحد في جيبو زوز سواڤر légères!!
• الفرق انو النبار بعد رمضان بش تلقاه حاطط على حيطو travel to ولا got engaged to ووخينا موضوع الفواياجات والعرس مبعدو على مخو تسعة آلاف ميل، وعاد شبيه كان حب وحدة كان يقرا معاها في الفاك؟؟ الفقراء مش من حقهم يحبو، الحب ماهوش متاعهم!!
• الفرق أنو النبار ووخيّنا الحارق عندهم نفس الشهادة ومن نفس الـfac، جوست لولاني عدّى entretien وسلكها خاطرو beau gosse ولابس مليح وحتى اللبسة الخايبة تطلع عليه خاطرو ولد خير ديجا، وزيد يحكي فرونصي صحيح، ووخيّنا زادة سلّكها، آما الله غالب ماهوش présentable وشكلو لا يشِِ بأنو ولد خير ومنوّر وبش يزيّن واجهة الشركة، وزيد الفرونصي متاعو صحيح أما بركة اللكنة تاعو متع ڤصرين وبوزيد، جاي من حوم ولاد الحفيانة..
• الفرق أنو الحارق عاش مدفون وتولد “تحت” في عهد بن علي منذ 2005 ولا 2006 وهو يستنى في فرج ربي، مرة يقري étude، مرة يليّق في الحيوط، مرّة يدهن، وكي جات الثورة جابتلو معاها بصيص نور، ياخي طلعت مغدورة وزادت حطّتو تحت تحت تحت.. وفي نفس الوقت يرى في حافظ قائد السبسي (رجل أعمال ملياردار وابن رئيس دولة) يتعارك مع يوسف الشاهد (رئيس حكومة يتقاضى 9 آلاف دينار في الشهر) من أجل انو لا يطبّق إملاءاتو، ولا واحد فيهم تلفّتلو، وإنت يا صديقي يا نبّار تجبد عليه الـtablette apple متاعك وانت راكش في gourmet المرسى وتكتب statut اففففف نعمبو اللي علمكم سياسة بن علي شوية فيكم يا “رعاع يا غجر يا جبورة”..
الليلة أختي النبّارة أخي النبّار وانتوما تعملو في دورة في المرسى ولا طلعة ڤمرت.. خمموا وإسألوا رواحكم، زعمة شنوة اللي يخلي عبد يحط حياتو على كفّو اليمين، ومستقبلو والـeurope على كفّو اليسار.. ويدخل على مغامرة ملغوزة، ونهايتها مجهولة؟؟ لولا أنو فقد الأمل من البلاد اللي ضحكتلكم وعطاتو هو بظهرها..
#براعيشولديإفهمالإصلاحاتالكبرىوحدك
#حوّسفياللاكوبلّعشيهمك
#نمطتاعوذني
