مالك بن عمر
هي #معلّمة_نائبة في مدرسة في أرياف الكاف..
معلمة شابة دخلت نافحة.. تحب تقرّي الصغار وتبني مستقبلها وتكون علاقات زمالة طيبة مع زملاءها المربين..
معلمة نائبة.. دخلت لمؤسسة تربوية تصدمت..
شافت معاملة زميلها المعلم للتلاميذ الصغار تفجعت..
معلّم يضرب في الصغار بالعصا على ريوسهم.. بالكاوتشو على ظهوراتهم.. بالي يجي في يدو في أي بلاصة..
التلامذة كل يوم ينقصو من المدرسة.. تلامذة خيروا يبطلو القراية وما يمشيوش للذل والعذاب..
الأولياء.. بسطاء.. خافوا.. وما شكاوش.. وخلاو صغارهم من غير قراية..
المعلمة النائبة شكات.. حكات مع الاولياء.. حكات مع المدير..
المدير.. صاحب المعلم..
المدير ستانس يهز التلانذة يخدمهم في دارو وفي أرضو..
المدير تقلّق من المعلمة النائبة.. المعلم تقلّق من زميلتو النائبة..
المعلمة النائبة صورت المعلّم وهو يعذّب في التلامذة..
مشات شكات.. للمندوبية.. للوزارة..
الرد كان سريعا..
تم نقل المعلمة النائبة من المدرسة.. هزوها لمدرسة أخرى في منطقة نائية.. تبعد عليها 7 كلم.. فمة كرهبة وحدة تهزلها.. سواق الكرهبة ضغطو عليه باش ما يهزهاش..
المعلمة النائبة ما عادش تنجم تمشي تخدم.. وما عادش تنجم تقرّي..
والمعلم والمدير يخدمو.. والمندوب يخدم.. والوزير يخدم..
المعلمة النائبة شكات وحفات ساقيها.. ما تلقى كان التسويف والتجاهل والمماطلة..
المعلمة النائبة عطات الفيديو للتلفزة عداتو… تحل بحث وتحقيق ومحاكمة..
الاولياء الكل استعرفو الي هوما في بالهم وما يحبوش يشكيو..
المحكمة حكمت على المعلم والمدير عامين سجن مع تأجيل التنفيذ..
المعلمة النائبة زادت شكات وحفات ساقيها.. وكالعادة ما لقات كان التسويف والتجاهل والمماطلة..
المعلمة النائبة في لحظة قهر وضعف وانهيار حرقت روحها..
المعلمة النائبة عدات جمعتين في السبيطار.. وتوفات..
المعلمة النائبة توفات.. والمعلم والمدير يخدمو.. والمندوب يخدم.. والوزير يخدم..
رحم الله فوزية الطالبي..
المعلمة النائبة توفات.. والمعلم والمدير يخدمو..
![](https://tadwinet.net/wp-content/uploads/2020/12/%D9%85%D8%A7%D9%84%D9%83-%D8%A8%D9%86-%D8%B9%D9%85%D8%B1.jpg)