تجي في راس الزوالي وتحيا قرعة السفير…

مالك بن عمر
سامحوني باش نحكي على السفير الفرنسي..
مش على ختانه من عدمه… ولكن على قصّة ركوبه على جمل على ملك الجيش التونسي.
انا من اللول ما تلهيتش بالموضوع.. وما حبيتش نحكي فيه.. أما فمّة حاجة خلاتني ملزم باش نحكي..
كيف شفت أغلب الاعلاميين الي تناولوا الموضوع، اغلبهم يدافعوا على السفير وعلى ركبة السفير… وعاد شبيه… وشنية المشكل… وماكانش وحدو ومعاه سفراء اخرين… وفي نهاية الامر كيفو كيف السياح… يركب على الجمل…
واغلب الاعلاميين، يتهكموا على التوانسة الي عملوا من الموضوع قضية رأي عام وقالك الحكاية وراها تجييش سياسي من الحراك وياسين عياري وهاذم عباد قاعدين يصطادوا في الماء العكر… كل هذا بالطبع من أجل عيون السفير…
الحاجة إلّي نساوها هؤلاء المدافعين على السفير، أن الجمل هو ملك للجيش التونسي ولا يجوز استعماله إلا للاغراض المعدة له وقائد الجمل خفير بالجيش التونسي ولا يجوز له القيام بأي عمل مخالف للتعليمات.
الحاجة الاخرى إلّي نساوها أشباه الصحفيين والكرونيكورات البودورو، أنو السفير صور فيديو أعوان الجيش الصحراوي بالكاميرا متاعو وشد صحيح باش يركب على الجمل… زعمة علاش ؟؟ قلّة الجمولة في تونس ؟؟ اهوكا جمل الصفصاف… في الحمامات في جربة.. في.. في.. يلقى جمل يركب عليه..
أنا ريت انو شد صحيح باش يركب على جمل الجيش إهانة للجيش التونسي (حاشاه).
نكبّر في الحكاية ؟؟؟
باهي يا سيدي… هاو فمّة فصل في مجلة المرافعات والعقوبات العسكرية يعاقب بالسجن من ثلاثة أشهر إلى سنتين كل عسكري يتعمد تعطيل الأسلحة والأجهزة والألبسة و… الحيوانات وأي شيء من أشياء الجيش إن كانت هذه الأشياء في حفظه أو في حفظ غيره… (الفصل 107).
فهمت ايها الكرونيكور… ايتها الكرونيكورة ؟؟
بالفلاقي الحيوان ملك الجيش ولا يجوز تعطيله تحت اي ظرف كان… والعسكري الي سمح للسفير باش يركب وعمل بيه دورة ينجم يتحال على المحكمة العسكرية بتهمة الفصل 107 المذكور اعلاه.
مش مشكل… تجي في راس الزوالي وتحيا قرعة السفير…