عمى الإيديولوجيا وحماقة السياسة

ماهر العباسي
في السياسة يلزمك تذاري خصمك قبل حليفك.. وتاخو بخاطرو وتسايسو وتحاول تلقى معاه أرضية… خاطر هكاكة تفشلو العجالي وتعملو جوان دو كيلاس في الموتور… أما كيف تتكتل ضدو وتهجم عليه وتحصرو في التركينة تسمحلو باش يرص صفوفو وتولي حكاية حياة أو موت ويتحالف حتى مع الشيطان باش يسلكها.
التكتيك الأحمق هذا متاع التكتل والهجوم عالخصم عملو الجميعة مع النهضة في 2013 ياخي رصو صفوفهم وتحالفو مع السبسي الي وقتها بالنسبة ليهم الشيطان الأكبر ودخلت عن طريقو النهضة لدواليب الدولة وبدات تتقبل شيئا فشئا عند المجتمع والنخبة كحزب عندو رجالات دولة ووزراء وزعيم محترم مالخارج والداخل.
نفس التكتيك الأحمق عملوه مع حافظ قايد السسبسي ياخي كانت النتيجة الي هو رمى روحو في أحضان الشيخ والنهضة.
نفس التكتيك الأحمق حبو يعملوه البارح ضد تحالف حافظ والنهضة وأدى بالطبيعة لتقوية التحالف هذا… ولكن فمة حاجة مافهموهاش وهي أنو حافظ مسنود 100% من بوه… ياخي تسخايلو السبسي باش يطيش ولدو خاطر النمط والتوازن وراس لمبوط ؟؟ تي بالله العظيم السبسي محافظ أكثر مالغنوشي أما يعرف من أين تؤكل الكتف… انتوما بالحماقة متاعكم رميتو السبسي الأب والإبن في أحضان الغنوشي وخلقتو تحالف المحافظين إلي هو باش يربح الإنتخابات البلدية والتشريعية والرئاسية الجايين… والدليل الي السبسي إختار نهائيا النهضة هو ضربة المعلم متاع جيبان سليم الرياحي… أحنا قداش ناقصنا باش نجيبو ال109 صوت 5 والا 6 نواب جيب الرياحي معانا ونضمنو الأغلبية… وتفرجو توة كيفاش التحالف الجديد باشيعدي قوانينو عجاجة… وتفرجو كيفاش باش ياقع انتخاب رئيس الإيزي اليوم .. واتوتشوفو المحكمة الدستورية والقوانين الاخرى كيفاش في لحظة باش يتعداو …
حاجة بركة… نشاء الله يوسف الشاهد يحسم موقفو مالزوز تحالفات في أقرب وقت وما يقعدش le cul entre deux chaises.
والسلام