مساندتي لحملة مانيش مسامح مساندة منقوصة

مالك بن عمر
أنا مبدئيا مساند لحملة مانيش مسامح، مللول موش من توة… ولكن عندي الكثير من التحفظات التي تجعل من مساندتي مساندة منقوصة.
أول التحفظات هو ظهور اليسار الوطدي الانتهازي كمتزعم لجميع تحركات الحملة. في حين ان هؤلاء هم أول المطبّعين مع الفاسدين منذ عهد بن علي ونادوا بعدم تحصين الثورة وساندوا السبسي في الانتخابات الرئاسية.
ثاني التحفظات هو الاقتصار على موضوع قانون المصالحة والتركيز عليه دون توسّع. في حين أن قانون المصالحة ليس الأخطر.
• أنا مثلا مانيش مسامح مئات الالاف من الموظفين الي يخلصو من فلوس الشعب وما يعملوا في حتى شي.
• أنا مانيش مسامح آلاف الموظفين الي دخلو بالاكتاف والمحسوبية فاكين بلايص غيرهم وياخذو في شهرية وما يعملو في حتى شي.
• مانيش مسامح الدولة الي تسمح بالتوريد العشوائي وتوزع في رخص التوريد على احبابها واصحابها، الامر الي خلى مخزون عملتنا الصعبة يتآكل ويمشي في الشكالط والقلوب والشراب والكماليات الفارغة.
• مانيش مسامح الدولة الي تاخو في قروضات كبيرة باش تخلص التوريد العشوائي.
• مانيش مسامح الدولة الي نازلة على المواطنين بالضرائب المباشرة وغير المباشرة باش تخلص شهاري آلاف الموظفين الزايدين والا الي داخلين بالاكتاف.
• أخبرا مانيش مسامح لا دنيا لا آخرة كل سياسي حط يديه في يدين الفسّاد اما انتهازية او خوفا.
#مانيش_مسامح موش قضية قانون… يلزم تكون قضية وطن.