ثورة البرويطة “vs” ثورة الكرامة

ماهر العباسي
بهدوء
لا هي ثورة البرويطة خاطر كنا عايشين في أمان: صحيح.
لا هي ثورة البرويطة خاطر كانت الدولة التونسية محترمة وعندها سلطة في البلاد وموش كركر شلاكتك وقف البلاد: صحيح.
لا هي ثورة البرويطة خاطر الإقتصاد إنهار: صحيح.
لا هي ثورة البرويطة خاطر التدخل الأجنبي ولى عيني عينك: صحيح.
لا هي ثورة البرويطة خاطر الوسخ والخمج والفوضى والتسيب والتكركير والهمجية وصلو لمستويات قياسية: صحيح.
لا هي ثورة الكرامة خاطر طردنا ديكتاتور وعايلتو واخترنا شكون يحكمنا بكامل الحرية: صحيح.
لا هي ثورة الكرامة خاطر ولينا شعب حر يعبر على افكارو بحرية مطلقة وبدون خوف: صحيح.
لا هي ثورة الكرامة خاطر كتبنا دستور ممتاز وقاعدين نرسخو في دعائم الديمقراطية بشهادة العالم أجمع: صحيح.
لا هي ثورة الكرامة خاطر الأمن تحول من العسان على شنوة يقولو العباد للدفاع على أمن الوطن وتصرفو مع المواطن تبدل برشة وولى فيه برشة احترام وماعاداش البوليس رمز الخوف (بالطبيعة الحالات الشاذة تحفظ): صحيح.
لا هي ثورة الكرامة خاطر الشهريات متاع جميع الموظفين زادت وفمة الي تضربت في الثنين وحق الاضراب والدفاع عن الحقوق مكفول بالدستور: صحيح.
لا هي ثورة الكرامة خاطر الي يحكم في البلاد ولى يحس الي هو مغصور ويا ربي يسلكها قدام النواب والصحفيين والشعب بعد الي كان انا ربكم الاعلى: صحيح.
لا هي ثورة الكرامة خاطر كي تبدى صاحب مؤسسة تخدم على روحك ويجيك واحد طحان يقلك ايا باشتعطينا تبرعات للولاية تصورو وتهبطو عالفايسبوك والعباد تشبع فيه بخس ويضربلك على الطيارة الي وقت بن علي الي يحك راسو يتعدالك ويقلك كح تبرع لـ 26-26.
لا هي ثورة كرامة خاطر بدينا نحكيو عالفساد وتشدو روس كبار وروس صغار والحرب بدات وماهياش باش تاقف مهما تبدلت الحكومات.
الخلاصة: هي فعل انساني فيه برشة خايب وبرشة باهي احنا مشينا فيه وكلينا العصا لين شبعنا وتوة بدينا نقربو باش نبداو نجنيو الثمار… ردو بالكم يلعبولكم بعقلكم ويقولولكم قبل خير والا قوس وتسكر… وبكرة تشوفو مصر.