معقولة.. لا يجدون لي مكانا في الحكومة ؟

الطيب الجوادي
عمّكم الجوادي حزين ومنرفز، وأقسم ألا يتناول لحم العلوش أسبوعا كاملا.
معقولة انا الطيب ولد هنيّة، متحصل على سيزيام عام 1974، لا يجدون لي مكانا في الحكومة؟
بالله خذوني على قدّ عقلي !
زعمة سمير بالطيب يفهم في الفلاحة خير منّي؟ أنا تولدت في الفلاحة، وعندي خبرة في الحراثة والزراعة والدّرس وتربية الماشية والنحل، ونعرف كل مشاكل الفلاحين!
باهي خلينا من الفلاحة، علاش ما عطاونيش وزير لدى رئيس الحكومة مكلف بالاصلاحات الكبرى؟ التي تم اسنادها لواحد اسمو توفيق الراجحي؟
احنا لكلنا نعرفو أنو ما ثماش اصلاحات لا كبرى لا صغرى، معناها عمكم الجوادي يضرب مرسيدس، وفيلا، والماء والضوء على الحاكم، ونركش تحت المكيف، بلا غير ما نصلّح شيء، باعتبار انو في طونس الشقيقة حتى شيء ما يمكن اصلاحو، باهي ووزارة التربية؟ بالله اشنوة يعمل وزير التربية؟ ندوة صحفية في بداية السنة الدراسية يستعرض فيها بعض الارقام، ويوعد فيها بتحسين الأوضاع ويلتزم أنو الاصلاحات ستبدأ السنة الموالية! وندوة صحفية أخرى يعلن فيها انو صديق للسعد اليعقوبي وما عندوش معاه مشكل! وندوة في آخر السنة يعلن فيها تحسن عدد الناجحين!
ولو تم تعييني كنت أدمج أغاني شمس الدين باشا ضمن برامج الباكالوريا، انطلاقا من القولة المعروفة : الشعب يحبّ اللّعب!
تي أنا بصراحة كنت طامع في منصب رئيس الحكومة، وصدقوني، ممكن البلاد ما نخليهاش تفلس أكثر ماهي فالسة!
موش مشكل، أما توة تشوفوا نتيجة إهدار طاقة خلاّقة كيف عمّكم الجوادي.