لماذا تفشل أن تكون رئيسا لكل التونسيين والتونسيات ؟

منية ابراهيم‎

عذرا:
السيد رئيس الجمهورية محمد الباجي قايد السبسي :
يراودني تساؤل اليوم ونحن نحتفل بعيد #المراة_التونسية
لماذا تفشل في كل مرة ان تكون رئيسا لكل التونسيين والتونسيات ؟
لماذا هذا الاصرار العجيب على الفشل ؟ 
لماذا تعجز ان تكون رئيسا لشعب لتكون رئيسا لحزب؟
السيد الرئيس:
نعلم ان ديون le vote utile ثقيلة ونعلم ايضا انك تخلص فيها بالانتريس.
يمنحك دستور الثورة الحق في المبادرة التشريعية ومنذ 2014 تكرمت على الشعب التونسي بمبادرتين تشريعيتين الاولى تهم متعاطي المخدرات والثانية تختص بالعفو على الفاسدين من رجال الاعمال ومن الادارة والثالثة والرابعة في الثنية وتهم المساواة في الارث وحرية اختيار القرين.
السيد الرئيس:
كيف تكمل تخلص ديونك والانتريس متاعهم قولنا باش نعلموك وقتها ان الشعب التونسي تعداده فوق العشرة مليون نسمة.
ونعلموك ان خالتي هنية الي ساكنة في غربي ينفخ عليه الريح يطيروا ما يهمهاش في مباداراتك.
هي تحتاج من رئيس الدولة مبادرة تحفظلها كرامتها.
ونعلموك زادة ان نساء سيدي محمد الي رقصوا فرحا لرؤية الماء يحتاجوا مبادرة من رئيس الجمهورية تروي عطشهم للحياة الكريمة.
ونعلموك زادة ان النساء الي يعبيوهم في الكميونات باش يمشيوا يزرعوا ويحرثوا ويجمعوا يستناوا هوما زادة في مبادرة من الرئيس تحفظ حقوقهم وحياتهم.
ونعلموك زادة الي بناتنا الي يسفروا فيهم شبكات مختصة للخليج بعقود عمل وهمية وغادي يوليوا لحم رخيص ملوح على قارعة الطريق هوما زادة يحتاجوا لمبادرة من الرئيس.
ونحكيولك زادة على النساء الي تخدم في المعامل والنزل واش يقاسيوا.
ونحكيولك على البنات الي يُقصُوا على قرايتهم خاطر المدرسة بعيدة عليهم كيلومترات.
السيد الرئيس:
عنا برشة حكايات على نساء تونس الكل ولهذا كيف تكمل تخلص ديون le vote utile عيشك قولنا باش نحضروا رواحنا احنا نحكيولك على نساء تونس وانت اعمل المبادرات واللجان على مقاس كل واحد.