سوق الكلاب

مكرم عفيف
قيلت شوية حلمت بداري تسرقت… قررت ناخو احتياطاتي ونهبط لسوق الكلاب في المنصف باي…
أيّا سيدي أنا قريب نخلط عرضني صاحبي اختصاصي ويفهم فيهم مليح…
قتلو جابك ربي بش ترشدني…
قالي ادلل خويا مكرم… وقالّي نبداو بالكلاب الرخاص وأحنا طالعين… قتلو الله يبارك…
قالي شوف خويا البطحة هذي أرخص كلاب… والرّاطسه متاعهم مضرحة ومشتلين من كل كرع كلب، الرّاطسة هذي نسميوها راطسة الاعلام، راطسة لاحّاسه ورخيصه وذليله وغدّاره تميل وين يميل الريح يلزمك ديما توكّلها مكانش تدور عليك… شوف خويا هاك الكلب لسود من الراطسة هذي مولاه مسميه “كلب أنفاق” على خاطرو مغروم بالأنفاق في الجبولات… ريت الكلب الّي بحذاه!!! الّي راسو كبير مالبخس، هذاكا نعيطولو بوكلاّب لكن اسمو الحقيقي “كلب الخمّارات”… شوفهم الزوز كيفاه يتمسكنو للجروة المسبوعة… تي هذيكه الصلعة… الجروة هذيكة اسمها “جيستومون” تضهر فينو لكنها مسمامه وسمها يقتل… الّي بحذاها اسمو الكلب الغربي المجنون… كل مرّه تقوم عليه هبلة ويدخل بعضو نفسانيا…
قتلو بصارحة الكلاب هذومه فديت منهم وماعنيش فيهم… هيّا نشوفو راطسة أخرى…
قالي باهي… ريت البطحة هذيكه… هذيكه فيها كلاب راطسة “مرتزقة السياسة”… كلاب لا دين لا ملّه… العضة متاعهم متاع موت… يبيعو الڨرد ويضحكو على الّي انتخبو… داهم في الفلوس… توريهم الفلوس والكراهب المضخمة يرنبولك ويرجعوك باي… شوف هاك الكلب الّي حناكو منفوخه، هذكا مولاه مسميه “طبّال” نهار الكل وهو يطبل لأسيادو… شوف خويا هاك الكليب نعيطولو ولد الصالحه والّي بحذاه ولد حليمه… خاطر معرفناش أبّاتهم شكونهم… بحذاهم كعبتين كلاب حراس الايديولوجيا… ما ننصحكش بهم خاطر أبهم منهم ما فمّاش والّي يجي يعڨبها عليهم…
قتلو بصارحه ما عجبونيش الكل… نشوفو حاجة أخرى…
قالي ادلل… ريت خويا مكرم الكلاب هذوما… غاليين برشه عند الّي يدريسي فيهم… هذوما كلاب متاع أفاريات كبيره وأفاريات ادوّخ !!!
قتلو: كيفاه ؟…
قالي: ريت الكلاب هذوم يعسّو على ثروات البلاد والمناجم الكل ومايخلّيو حتى مواطن يجيب دوسي من دوسيات المناجم وين يتجبد دوسي الكلاب هذوما يعملو كارثة في البلاد وفي جبولاتها… ريت الكلبه هذيكه مولاها مسمّيها شمّاموي على خاترها تشمشم ياسر عالپترول وتشمشم عالعباد الّي يحبو يجبدو دوسيات البترول… الكلب البحذاها اختصاص ملح… الّي بحذاهم اختصاص فسفاط والبعدهم بقية المناجم…
قتلو والرّاطسة اللّي يبيع فيها هاك الخليجي…
قالي أناهي؟؟؟
قتلو الخليجي هذاكا الّي واقف بحذاه راجل…
قالي ماعرفتوش الراجل هذاكا؟؟
قتلو لا…
قالي هذاكا دحلان العميل والخليجي هذاكا اماراتي كل مرّه يجي لتونس يربّي كلب ويبيعو… والكلب الّي عندو مسميه “الكلب المزروب” داه يحب شد زميم على الكلاب الّي ريتهم الكل… يبيع أمو وبوه ويقتل خوه بش يشد الزعيم…
قتلو: وشنوه الّي مانعو؟؟؟
خزرلي صاحبي وقالي : خويا مكرم شوف هاك الڨاوري !!!
قتلو: شبيه؟؟؟
قالي : شوف الكلب الّي في يدّو!!! كلب ذميم لكن ماضي برشه ويحكم في الكلاب الّي ريتها الكل والّي يحب يحط راسو من راسه يبعثو وراء التاريخ… آخرهم قضى على كلب اسمو “الكلب الجرّاي” مسامينو “الكلب اللطيف المافيوزي”.
قتلو باش نشريه…
قالي خويا مكرم ما تنجموش وحدك كان ما تجيب ولاد حْوِم تونس الكل وانشالله تنجموه…
قتلو خلّيني نجرب … أنا قربتلو وعضني عضّه ما فقت كان بالوالده قتلي قوم عيش ولدي يزّي مالنوم معادش بكري على شقان الفطر.