سكوتنا موش ديما رضاء

حليمة معالج

نداء إلى جماعة النهضة اللي انتخبتهم، واللي عمري ما قصرت في حقهم، واللي مازلت وفية ليهم اقتناعا وليس طمعا والكل يعلم ذلك.
ما فماش عاقل في هالبلاد ما يعرفش اللي النهضة وجماعتها هوما المستهدفين رقم 1 في هالبلاد من حليفكم قبل خصومكم، واللي الناس الكل تستنى فيكم في الدورة من غير ما تغلطو، فما بالك عند الخطأ. 
حليفكم النداء في التسميات وفي المغانم يقول اللي هو الحزب الاغلبي ومن حقّو باش ينال نصيب الاسد وما يعطيكم كان الفتات، وفي الأزمات يرميكم في الواجهة ويخلّيكم للعصا، وحطب للمعارك وهو يجبد روحو… وفي الأخير يخرّجو قرار رئاسي يمنّعوا بيه انفسهم، ويخليّوكم في التسلل قدام قواعدكم قبل الناس الأخرى.

يا وزراء محسوبين على النهضة،
ويا قياديين في النهضة،
ويا نواب النهضة، الزموا حدودكم وتكلّموا في حدود اختصاصاتكم وصلاحياتكم، واوزنوا تصريحاتكم.
اشنوة دخل عماد الحمامي وزير التشغيل باش يحكي على المسألة الأمنية، وعلى ظروف وفاة أحد شباب تطاوين.
علاش آخي ما فماش وزير داخلية..؟ وما فماش وزير صحّة..؟ ومافماش ناطق رسمي..؟
والا انت سي عماد أجدع منهم الكل.
يا سي عماد يا ريتك اكتفيت بتوضيح الاتفاق اللي صار بينكم وبين 1200 محتج في الكامور، واللي رفضوه 150 نفر فقط… وهكاكة تكون خلّيت نقاط استفهام مفتوحة.. يمكن تاويلها يكون لصالحكم.
يا ريتك ما هزيت ونفضت، وخلتني أنا وحدة من الناس نتمنى تنحيتك اليوم قبل غدوة.
كل ما أتمناه أن صيحتي هذه توصل للقائمين على النهضة، ويفهمو اللي سكوتنا موش ديما رضاء.
وان شاء الله الليلة ما تبداوش تهرولوا نحو البلاتوات وتزيدوا الطين بلة.
امسكوا عليكم ألسنتكم وخليوا أهل الاختصاص تتكلم.