النهضة خانت تاريخها وانبطحت وأصبحت عميلة وفاسدة…

الحبيب حمام
ـ وكان المفروض أنها تقاوم الفساد، وكان لزم تشد الجبل…
• لا عاد، شنوّه جبل! الجبل فيه داعش.
ـ مالى كان المفروض أنها تنزل في الحكومة ركبة، وتقلب الدنيا عليها وتتعاون مع الاتحاد للإطاحة بيها…
• لا عاد، شنوّه اتحاد! الاتحاد في يد الجبهة.
ـ مالى كان المفروض أنها ساعة ساعة تتكلم على الفساد، وتكتب مقال منا، وتشارك في بلاتو منا…
• لا عاد، شنوّه مقال! يعمل فيها المرزوقي والحراك، وما جابت شي.
ـ مالى كان المفروض أنها تقلب الدنيا في مجلس نواب الشعب…
• لا عاد، شنوّه مجلس نواب الشعب! يعمل فيها سالم الأبيض وسامية عبو وما جابت شي.
ـ مالى كان المفروض أنها في مجلس نواب الشعب تغزر على اليمين واليسار، وفين ماشي التصويت تاقف ضدو…
• لا عاد، ولاّت حزب الضدّ، اختصاص حمّه، وحقوق الطبع محفوظة، وما جابت شي.
ـ مالى كان المفروض تنبّر كيفي أنا على الفايسبوك…
•لا عاد، نبارة الفايسبوك مالين الدنيا، يتباعوا بالكيلو، وما عملوا شي.
ـ مالى كان المفروض ترجع للحبس، وتهجّ من البلاد…
• ما فمّش اعتراض، فكرة باهية.
والبلاد شكون باها؟ ما نيش أنا، على كل حال، أنا مهمّتي نقول ليكم آشكون غالط، ونعطيه على راسه.