اللي يتزوج أمي انقلو “يا بابا”

محمد الناصر رابحي

هاك العام وقت اللي كنت صغير مازلت انطش طشان في اللغة قلي واحد عبقري زمانو بان الأرض هذه مبنية على راس ثور.. بالعمل وقتها صدقتو وكل ما يقع زلزال نقول هاو طلع كلامو صحيح تقريب الثور رتح القرن اليسار وبدل هز الكورة الأرضية على القرن اليمين وهكذا دواليك، الحكاية جادة عليا كيما جادة على برشى ناس امثالي بالرغم من كون فيهم ناس كبار ويفوتوني في العمر والمستوى الدراسي وحتى الثقافي والمعرفي.. بالشوية بالشوية وثقب الجهل اللي في راسي بدا ينقشع وبديت نفرق بين الحقيقة والخيال والحق والصدق والكذب والبهتان.. اليوم بركة زاد اقتناعي ان حكاية سي وخينا امتاع هاك العام صحيحة اما ثمة خطأ صغير في التقييم لان الي هاز الكورة الأرضية موش ثور وانما وبحيث الصحيح انها حاشاكم مبنية على راس كلب.

ولهذا علاش الواحد منا ساعة ساعة يستغرب ويتعجب ويبهت من خلق ربي ؟ مثال التوانسة عملوا ثورة على جماعة التجمع… بعدها التوانسة هومة بيدهم امتاع الثورة عملوا انتخابات رجعوا التجمع.. اي اشبيه جاتك غريبة ؟ كل ما الثور -مؤنث ثورة- يبدل يهز الأرض على قرن من قرونو يتبدل العام وبالطبيعة تتبدل الموازين والمعادلات والقيم والأخلاق وحتى الألوان زادا.. يقول المثل الشعبي “اذا تعاركت لرياح تجيء في روس المراكب”.

لرياح وما ادراك ما لرياح حتى هي تعرف العرك والشباط والزياط والعياط والضرب بالمرفق وحتى بالصباط وما تسمع كان تراك تراك.. ريح يهز ولاخر يجيب.. ريح يجيبها بحري ولاخر يهزها بري ولاخر يهيجها صحري.. واحد يقلعها حشايش وشجر وحجر ولاخر يهيجها ويميجها أمواج في البحر.. ساعات ترى عرك رجالة صناديد وفرسان عتاتيد وساعات ترى عروكات ذراري.. واحد يقلو انا اقوى منك ولاخر يقلو ربي اقوى مني ومنك ولاخر يقلو انا اللي اندز المطر اللي في السحاب ونروي بيها عطش التراب ولاخر يقلو انا اللي اندز في المراكب في الإبحار وانجي العباد من الغرق والاخطار.. وواحد يزيد ولاخر عامل روحو الهلالي بوزيد وزيد الماء زيد الدقيق وكثر الهرج والمرج الممزوج بالتبندير والتصفيق قعدت المركبة مهددة بالغريق.

ثمة راطسة امتاع ناس راضعة الصبة والقوادة واللحاس.. تتشرجى كالبيل.. وتبدى تعزف مع البندير مواويل ومواويل ياعين وياليل قال اشنوة هاني نخدم على روحي.. الله الله حتى هي خدمة وعليها الكلام.. واحد قلي ياخويا راهي خدمة كيف بقية الخدم.. راني نجري على عايلة وقاعد ناكل في الخبز وشعاري اللي يتزوج امي نقلو يا بابا ونشطح للقرد في مملكته.. ولاخر قلي اخي قلك عليا نعزف وحدي في الفرقة ؟ تي راهي بالالاف البارح بندرنا للزين وبعدو المرزوقي وتوة الباجي نقلبوا الديسك ونرجعوا نعزفوا الله احد الله احد والبجبوج ماكيفو حد وهي ماشية.. قتلو لا من ناحية ماشية ماشية وعلى أربعة زادا.. اخي عبد الرحمان بن خلدون غالط كيف قال جملتو المشهورة منذ قرون وقرون “اذا دخلت افريقية فوافق او نافق او غادر البلاد” وتحيا الموافقة ويعيش النفاق وخلاف ذلك ارض الله واسعة.