من يُعشّش كالبرد القديم بين مفاصل وزارة المالية ؟

عايدة بن كريّم
دولة المجبى:
“مواطن” من أبناء الشعب المزمّر لديه “حانوت” يسترزق منه وغالبا هو يبيع الريح للمراكب الحارقة للمبدوزة.
عنده “باتينده” ولديه مُعرّف جبائي وكلّ شهر يُصرّح بشكل تلقائي بما قدّره الله له وبما ساقته الفلوكة الحارقة من رزق.
استيقظ ذات صباح ليجد تحت الباب “قرار توظيف إجباري” مُرفق بتفاصيل وأرقام وفصول أحكام مجلة الجباية مختومة من طرف رئيس مكتب مراقبة الأداءات ومدير مركز جهوي وعونان مُكلّفان بمُهمّة التعديل والتصويب والتنبيه والإعلام. ثقّلوا عليه ثمانية ألاف وبعض المئات من الدنانير وشوية صرف !!!
هرول نحو مكتب مراقبة الأداءات قالوا له “اعمل اعتراض”…
عمل إعتراض وهرول ثانية نحو رئيس مكتب الجباية هذا الأخير وهو “ناس ملاح” طلع هبط قرأ الإعتراض “شكلا ومضونا” بعد التأكّد من وجود خلل شكلي أبدى استعداده للتعاون وتحوّل إلى المضمون وأخذ ورقة وبدأ يحسب… فجأة توقّف عن الكتابة وقال: “في مستوانا أحنا الإدارة ما نجّموا نعملوا حتى شيء حسب المرفقات التي تقدّمت بها أنت طالب annulation (إلغاء) وهذا قرار لا أحد يتحمّل مسؤوليته في الإدارة خاصة في السياقات الحالية… ولهذا ما دمت متأكّد من أنّك على حقّ امش للمحكمة واعمل إعتراض… قرار القاضي ما ينجّم يشكّك فيه حتى واحد”…
مشى للمحكمة أول واحد اعترضه قال له وين ماشي مسيّبة الدنيا “أعمل محامي هذه الأمور صعيبة برشة ويلزمها محامي يكتب عريضة ويطلب جلسة”.
مشى للمحامي (صاحبو) باش يوضّح له كيفاش يعمل عريضة… هذا الأخير استعمل جميع المصطلحات إلّي ما يفهمهاش المواطن العادي: نظام تقديري/نظام حقيقي… مراجعة مُعمّقة… دفتر المصاريف… دفاتر المُحاسبة… توظيف إجباري.. جلسة صلحية.. حكم ابتدائي… تعقيب وختمها بعشرة في المائة.
هذا المواطن عنده أسبوع ما يرقدش وما يخدمش وما يحكيش كان في هذا الموضوع…
__________
طبعا هذه واقعة تتكرّر يوميا في كلّ نقطة شملتها رعاية الدولة الوطنية الحديثة… أعوان يخدموا “على بعضو” ومدراء يصحّحوا “على بعضو” ومُحامين يقتنّصوا في الفرص “على بعضو” ودولة تنهب “على بعضو” وشعب يحبّ يهجّ من بلاد شعارها “على بعضو”.
من يدفع نحو ثورة علي بن غذاهم؟ من له مصلحة في انفجار الوضع؟ من يُعشّش كالبرد القديم بين مفاصل وزارة المالية؟