هذا شنوة يحب يعمل يوسف الشاهد

ماهر العباسي
بهدوء
أنساو الشعارات الفضفاضة متاع الشيوعيين والأسباب الواهية متاع الكركارة وأنساو الشاهد والبجبوج والنهضة وأغزرو لبلادكم
عنا حسب جميع التحاليل العالمية والمحلية 250.0000 موظف زايد قاعدين ياخذو في شهرية ويعطلو في الخدمة متاع الإدارة
عنا حسب جميع التقارير العالمية والمحلية أعلى نسبة في العالم متاع أجور وتجز كبير في الميزانية يخلينا نتسلفو باش الدولة تخلص الموظفين الي فيهم 250.000 زايدين وماحاشتناش بيهم في عوض الفلوس الي نتسلفوهم نعمل بيهم تنمية نخدمو بيهم البطالة نصلحو بيهم سبيطاراتنا ندخلو بيهم الماء لمكاتبنا باش ولادنا ماعادش يمرضو بالبوصفير نخلقو بيهم ثروة ونعطيو بيهم أمل لآلاف العباد البطالة والفقراء والمأيسين والي يحضرو في رواحهم باش يترماو في أحضان الإرهاب باش بعد عام والا عامين يطرشقو رواحهم في مكتب ولادك والا ولادي.
هذا هو المشكل الحقيقي وهذا عندو حل واحد : التعاون بين القطاع العام والخاص. القطاع الخاص عندو الفلوس والأفكار والخبرة والعلاقات والصنعة والدولة عندها الامكانيات الضخمة والادارة واليد العاملة والموظفين والأراضي… ونعملو مشاريع تبدا غدوة تتنفذ خاطر الفلوس والافكار موجودة وخاطر الدولة تسهل الاجراءات وتعطي الاراضي ونخرجو آلاف الموظفين مالإدارة نخدموهم في المشاريع هذي ونخدمو آلاف البطالة ونقصو من عجز الصناديق خاطر وقتها انجمو نوخرو في سن التقاعد ونخدمو شباب في المشاريع الي باش تتعمل ودونك عنا شكون باش يعطي لفلوس للصناديق لمدة عشرات السنين…
هذا هو الرهان الحقيقي وهذا شنوة يحب يعمل يوسف الشاهد وهذاكة علاه انا معاه على طول الخط خاطر الوحيد الي عندو الشجاعة باشيحط صبعو على الداء… نتلفت من قبيلة نلقى أغلب العباد يتمقعرو على الحكومة كيفاش قاعدة مع الجمهور… شفتو التفاهة والشعبوية ؟؟ العزوزة هازها الواد وهي تقول الوزراء قاعدين مع الجمهور