جورج واشنطن والمجاهد الأكبر متع تنزانيا

وائل زميت
اليوم عيد ميلاد جورج واشنطن… واحد من الآباء المؤسسين ومن اكثر الرؤساء الامريكيين شعبية… قاد واشنطن حرب الاستقلال عن بريطانيا وتم انتخابه اول رئيس لامريكا لفترتين من 1789 إلى 1797… الطريف انو الامريكان ما عرفوش شنوة يعيطولو، فصار جدال كبير في الكونجرس وواحد من المقترحات الي كانت مطروحة هو اللقب التالي: “His Mightiness, His Excellency, His High Mightiness, the President of the United States and Defender of Our Liberties” في الاخير تم الاتفاق على الاكتفاء بـ Mr. President

هذا قبل قرنين ما يجي رئيس آخر في دولة تنزانيا سمى روحو “المجاهد الاكبر” و”سيد الاسياد” و”الزعيم” وكمل حط اسمو في النشيد الوطني متع تنزانيا…
بخلاف كونه قائد حرب الاستقلال واول رئيس منتخب لامريكا، اعتقد انو كان فما حاجة فعلا تحسب لواشنطن هو كونه خير المغادرة بعد استكمال دورتين انتخابيتين وهنا نرجعوا لتنزانيا وين “سيد الاسياد” اعلن نفسه باي شبه جمهوري، ونذكروا موقفه عندما حدثه مرة الرئيس السينيغالي سيدار سينغور عن فوائد التنازل عن السلطة في وقت معين، وكان رد المجاهد الاكبر التنزاني: “هذه هلوسات رجل اسود”… طبعا شنوة تستنى ممن نصب نفسه رئيسا مدى الحياة وممن راى شعبه عبارة عن “غبار من بشر” كما صرح هو ذات مرة…
على كل، اليوم ترامب مكان واشنطن… وفي تنزانيا جاء الوريث غير الشرعي الباجي قايد الزطلة… تعرفوا شنوة يجمع الاثنين؟ الاكيد موش الوزراء. واشنطن كانوا دايرين بيه جون آدامز والكسندر هاملتون وتوماس جيفيرسون وهنري نوكس… والباجي حكومته فيها سمير بالطيب وماجدولين الشارني وناجي سينوج ومستشاريه بن تيشة وفراس ڨفراش وسعيدة ڨراش والساق الناعسة حافظ ولد بوه… ملا شنوة كانت نقطة التشابه بين الرئيسين؟
كما هو معلوم الباجي عندو دبوات شراب… وجورج واشنطن في وقته كان واحد من اكبر مصنعي الوسكي في امريكا 😀
تحية لشعبنا التنزاني السمح…
رَبَّنَا أَخْرِجْنَا مِنْ هَٰذِهِ الْقَرْيَةِ الظَّالِمِ أَهْلُهَا
رَبَّنَا أَخْرِجْنَا مِنْهَا فَإِنْ عُدْنَا فَإِنَّا ظَالِمُون