رسالة إلى زملائي الطبة

حاتم الغزال
ثمة ميساج حبيت انوصلو لزملائي وماكانش وقتو النهارين الي فاتو واما لازم اليوم انقولهولكم…
1. الطبيب التونسي عندو مشكلة كبييييرة متاع تواصل مع الناس والاغلبية سواء كانوا اساتذة كبار وإلا في بداية المشوار وسواء على الفايسبوك او في وسائل الاعلام ما يعرفوش يكونوا جملة واضحة ومفهومة من غير كلام صعيب لازم المواطن الكريم يحل عليه Larousse Médical باش يفهمو شيحب يقول…
2. اللوغة متاع شعب بهيم واحنا قاريين 12 سنة بعد الباك واحنا عاملين مزية عليكم لوغة خطيرة وتزيد تكبر في الحاجز النفسي بين الطبة وبين بقية الشعب ولازم نفهمو انو الحرب على الشعب هي حرب خاسرة بالضرورة… احنا حربنا ضد نظام صحة فاسد ومنخرم والشعب هو أول ضحية للنظام هذا واحنا الضحية الثانية… خاطر فساد المنظومة الصحية ممكن يتسبب في حبس الطبيب ولكن الاخطر انو ممكن يتسبب في موت المواطن.
3. الطبة الواعيين والي عندهم خطاب سلس وأسلوب في التعبير وبعد نظر ويجلبوا احترام الناس سواء في القطاع العام او الخاص يلزم يتحموا مسؤولياتهم لتمثيل القطاع وما يخليوش المكان فاضي لمن هم أقل قدرة على تمثيلنا احسن تمثيل باش ما انقولش حاجه أخرى.
4. السيدة وزيرة الصحة كي الزير المتّكي لا تضحّك لا تبكّي ومن رابع المستحيلات انها تقوم بإصلاح اي شيء في القطاع حتى لو تبقى 4 قرون في الوزارة ولذا عملو على ارواحكم وعلى مؤسساتكم باش تصلحو الوضع.