موش بالمزية

وائل زميت
تفاعلا مع الخوضة الي صايرة، يا شعبنا السمح، تعرفوا شنية واحدة من اكبر مصايبنا في البلاد هاذي؟
انو كل واحد عايش معانا عبارة عامل علينا مزية ولا شادد علينا السماء لا تطيح ولا نموتوا كان سيادتو ما يرضاش علينا…
المعلم والاستاذ عبارة يقري بالمزية والمهندس فالقلنا ريوسنا صباح وليل خاطر سيادتو عدى كونكور بعد عامين بريبا والكوارجي الي يترشح للدور الثاني قريب يذلنا وما لازمش ننقدوه خاطر النفسية متعو تتجرح والطبة عاد هاكم ما قال حد لحد لازم نكونوا في حضرتهم كالميت امام غاسله سينون نوليو احنا الهوكش والجهال الي ما قريناش 118 عام بعد الباك… البوليسية زادة ما شاء الله و عيني ما تضرهم لازم في كل مناسبة يذكرونا الي هوما ساهرين “يحميو” فينا… التلامذة و الطلبة زادة هوما موش مقصرين يعني تحسو يقرا ليك انت موش لروحه تحسو قاعد ماخدة بالخاطر يستنى في الاستاذ يعملو تكريم انو مشرفنا بحضوره… البناي ولا plombier الي مش يجي يصلحلك حاجة متع نصف ساعة لازم يشيحلك ريقك ويجننك وبعد ويبدا يتجبد عليك تقول يخدم على رحمة الوالدين…
إلي ما حبوش هاذم الكل و غيرهم يفهموه الي راك سيادتك تخلص ماكش تخدم بالمزية و راو سيادتك معلم ولا محامي ولا طبيب ولا مهندس ولا نجار راك يا بشر هاذي خدمتك تخدم فيها راك موش بالمزية و راو كي نشكروك على خدمتك من باب التربية و اكهو سينون راو هكا الواجب متعك موش مزية…
في نفس الإطار حصلنا نحكيو على الخدم نذكروا الي كان فما مرض جدي تفشى بعد الثورة وانا نراه مرض بالرسمي خطير ومانيش نرى ليه في حتى حل خاصة امام الضعف الكبير متع “الدولة”، المرض هذا هو #القطاعية و#العصبيةالقطاعية… تتكلم على تصرف استاذ يهيج جيش، تنقد صحفي يقوملك فيلق جماعة IPSI، تحكي على التهرب الضريبي في المحاماة المحامين يوقفولك البلاد… تجبد معاملة عون “الامن” للشعب المزمر، النقابات الامنية يمدوا خنافرهم… تخمم مش تتكلم على طبيب، يسبوك بالفغونسي وبعد يبلوكيوك في فيسبوك…
#ياتحفونراكتخدمبالفلوسموش_بالمزية
رَبَّنَا أَخْرِجْنَا مِنْ هَٰذِهِ الْقَرْيَةِ الظَّالِمِ أَهْلُهَا.
رَبَّنَا أَخْرِجْنَا مِنْهَا فَإِنْ عُدْنَا فَإِنَّا ظَالِمُونَ.