وائل زميت
امريكا : عندما يتكلم الأبله وتنصح الخرقاء ويحلم الفاشي/الإرهابي الجديد
كنا نبروا على حكومتنا الهايلة متع الكفاءات الي قادرة تسير 4 دول، لين حتى الإخوة في امريكا ما شاء الله هاو هوما زادة خذاو نصيبهم و هكا يبدا ترامب في الخدمة الصحيحة: الزلعات متعو ومتع جماعتو.
المتحدث الرسمي باسم البيت الابيض الابله شون سبايسر، ينسج على منوال ناجي جلول وسلوى الشرفي متعنا وشدوه يبارتاجي من موقع the Onion (تونس نيوز متع امريكا) هبطوا ارتيكل ينبروا عليه يخي مشى فيبالوا مدح ليه هعهعهعهع… طبعا نفس الابله هذا، وعلى عكس عرفو المغروم بتيويتر، سي شون سبايسر قام كتب mot de passe متعو وهبطها في تغريدة على تويتر وبعد فسخها ههههه… الاخوة الامريكان نبروا عليه شوية وكذا، تعرفوشي من غدوة شنوة عمل؟ عاود موش بلعاني هبط mot de passe متعو مرة اخرى وبعد فسخها ههههه.
نمشيو من المتحدث الابله، للمستشارة الخرقاء، قامت طاطا Kellyanne Conway، مستشارة ترامب بزلعة هايلة، فبحيث في حوار صحفي وفي إطار دفاعها عن القرار العنصري #MuslimBan قالت انو العالم ما يعرفش الي حتى اوباما كان عمل قانون يمنع العراقيين من الفيزا بعد ما قام زوز عراقيين بارتكاب عمل ارهابي عرف بـ the Bowling Green massacre… الي الاخت ما تعرفوش انو لا اوباما هبط هالقرار الي تحكي عليه ولا صارت اصلا عملية ارهابية في امريكا بالاسم هذا… فبحيث في امريكا، هاذي سياسة جديدة لمقاومة “الارهاب”، اتهم غيرك بهجمات عمرها ما صارت اصلا !! وهنا نوجهوا تحية الاخوة الامريكان الي عندهم تقليد هايل برشا ويتمثل في fact-checking اي تحري المعطيات او المعلومات الي تتقال والتثبت من مدى صحتها… يعتمدوها برشا وقت الانتخابات والمناظرات… وتصوروا لو كان في تونس جاء عنا fact-checkers للمرتزقة الإعلاميين والسياسيين متعنا وللهلوسات والارقام والمعطيات الغالطة الي يسربيو فيها لشعبنا السمح…
نتعداو تو لحبيب الملايين، بعد الناطق الرسمي و مستشارته، العباد الكل تلهات بالقرارت العنصرية و التصريحات الشعبوية متعو، لكن ما ريت حد يحكي على تصريح قام بيه الاخ قبل مدة قصيرة، فبحيث الارهابي الجديد دونالد ترامب ينوي كان حب ربي يترشح للانتخابات الرئاسية القادمة… فبحيث في وسط حوار مع الواشنطن بوست، قص على الحوار عيط للمحامي متاعو قالو برا سجلنا شعار الحملة الجاية! تم فعلا تسجيل الملكية للشعار بزوز تعبيرات: Keep America Great و !Keep America Great
وهنا فرصة باش نذكروا الي slogan الي اعتمدوا الانتخابات الفارطة في الواقع ما كانش جديد وماكانش متاعو، وإنما سبق للمرشح الجمهوري الرئيس الاسبق رونالد ريجان انو اعتمد الشعار Let’s Make America Great Again … ترامب نحي كلمة let’s.
في نفس الإطار، نعلموا احزابنا وسياسيينا انو ترامب بدا فعليا في جمع التبرعات متع انتخابات 2020 والي في امريكا الاستعداد للانتخابات الموالية يبدا بعد يوم من اعلان النتايج… موش كيما دولة شقيقة تسمع في الاحزاب صباح وليل تدعو للانتخابات البلدية تقول سايي خلات العباد حاضرة والقايمات جاهزة ومش يربحوها الانتخابات… طبعا موش لازم نقولوا الي في صورة تنظيم انتخابات بلدية غدوة فانو الاكتساح سيكون للنهضة، ومعاه حزب ممثلي التجمع… اما الاحزاب المحسوبة على الثورة والكتلة الاجتماعية… زايد نعلق…
رَبَّنَا أَخْرِجْنَا مِنْ هَٰذِهِ الْقَرْيَةِ الظَّالِمِ أَهْلُهَا
رَبَّنَا أَخْرِجْنَا مِنْهَا فَإِنْ عُدْنَا فَإِنَّا ظَالِمُونَ
