المعتمد كونديدا ليبر

الحبيب حمام
المعتمد: يا مرى، شنوّه رايك نعدّي الباك؟
مرتو: أحسن ما تعمل، أنت في كل الحالات تنش في الذبّان.
المعتمد: صحيح، الصبّابة يڨجڨجوا عليّ كي الذبان، وآنا ننش فيهم.
مرتو: تي كلكم ذبّان، ماك كنت صباب قبل الثورة، معليناشي، هاتو نجيب ليك الكتب متاع ولد أختي، واقرا على روحك.
المعتمد: كيفاش؟ معتمد يمشي للّيسي، هازز كرطابة؟
مرتو: تي لا، ما فكرت كان في الكرطابة، نسيت أنو في وقت الخدمة لازم تكون في البيرو؟
المعتمد: مالى كيفاش؟
مرتو: سجّل كونديدا ليبر في معهد خارج الولاية.
المعتمد: فينو ها الليسي كونديدا ليبر، وعلاش خارج الولاية؟
مرتو: كونديدا ليبر موش اسم معهد يا … وتسجل خارج الولاية باش ما يسمع بيك حد.
المعتمد: إيه ووقتاش نراجع دروسي؟
مرتو: في النهار وقت الخدمة، أنت تنش في الذبان، اعمل حاجه مفيدة، واقرا دروسك.
المعتمد: إيه وكي نتكوانسى، وما نفهمش حاجة، شكون نسأل؟
مرتو: العسّاس، ما هو Bac+4. تو يفهّمك بالقمع.
المعتمد: العساس يخدم في الليل.
مرتو: ماهو في النهار تقرا، وفي الليل في عُوض تسهر مع اللي يسوى واللي ما يسواش، تسهر مع العسّاس، منو يراجعلك ومنك تتعلم شويه من أخلاقه، أخلاقك راهي ريحتها واصلتني، الناس كي يجيوا يسبوني يقولولي: يا مرت المعتمد.