يهديك يا وليدي، وتطلعلي طبيب وإلا إرهابي

الحبيب حمام
يا وليدي، إن شاء الله، وين تمشي تربح يا وليدي، برّه ربي معاك يا وليدي، ربي يوفقك، ويهديك يا وليدي، وتطلعلي طبيب وإلا مهندس وإلا طيارجي وإلا إرهابي، يا كبدي.
ـ ياما شنيّه إرهابي هذي؟
ـ يا وليدي، تطلعلي طيارجي وإلا كوّارجي، كيما واشسمو هذاك، المصري اللي يسمّوه إرهابي.
ـ بو تريكة؟
ـ إيه، تطلعلي كوارجي إرهابي كيفو يا وليدي، ربي يوفقك يا وليدي، ربي يبعّد عليك ولاد السوء، ويدوّر بيك ولاد الحلال والإرهابيين، يا وليدي.
ـ باهي ياما، دعاك وصل، يامي نقّص من ها الدعاء هذا، خايف على صحتك، موش على حاجة.
ـ راني ديما بعد كل صلاه ندعيلك، نقرى فاتحة وندعيلك، يا وليدي.
ـ الفاتحة تزي ياما، خير حتى من الدعاء.
ـ حتى الدعاء باهي يا وليدي، دعاء الأم ديراكت لربي، وزيد ما هي أختي، خالتك، ماشيه للحج تو نوصاها تدعيلك فوق عرفة وقدّام الكعبة، يا وليدي.
ـ ياما، قالوا الدعاء في مطار جدة خير.
ـ توّ نقوللها تزيد تدعيلك في مطار جدة ومطار كرطاج زاده.
ـ يا ليتني ما تكلمت.
ـ سمعتك اتمتم، ادعي يا وليدي، ادعي.
تورّط الولد، ما يحبش يعاكس أمو، وقاللكم: ادعيوا ربي باش ما يتقبلش دعوتها ودعوة أختها.