عليك بالتوانسة، ما يخرجوك منها كان هوما

الحبيب حمام
قالك هيلاري كلينتن تنرفزت: راجلي بيل يداها 10 سنين، وأنا يجي ضدّي واحد أحول ويغلبني. قالولها: عليك بالتوانسة، ما يخرجوك منها كان هوما.
– هيلاري : آلو، سمير بالطيب معاي؟
سمير: سيادة الوزير، يا مادام
– هيلاري: هيلاري كلينتن معاك
سمير: سامحيني، راني ما كنتش نتكلم معاك، كنت نتكلم مع المنظفة
– هيلاري: سمعت بالخبر يا سي سمير؟
قبل ما تبدى تشكي، سمير: شنيه المشكل؟ اڨلبوا بيه
– هيلاري: شنيه “اڨلبوا بيه”، تحب تقلي Sorry for what happened؟
سمير: يعني الغيوا الانتخابات
– هيلاري: شنيه شنيه؟ وكيفاش هذي؟
سمير: ساهلة ياسر: 35 ألف إضراب + 1300 اعتصام + 170 قطع طريق + كعبتين اغتيالات + اعتصام الرحيل + روز باللوز + الرباعي الراعي للحوار + The guided of Sunday + غلق الروضات الكنسية + انتخابات جديدة + نداء أمريكا، والأمور خمسة خمسة
– هيلاري: شنيه هذي The guided of Sunday؟
سمير: نحن عنا مهدي جمعة، ما عندكمش أنتم مهدي الأحد، لأنكم تصليوا بالأحد؟
– هيلاري: نحن ما نصليوش
سمير: مالى كان تشوف نحن، ولكن نتحدث على الدين نهار وليل في البلاتوات
– هيلاري: زعمه تخطف لو نعمل كيما قتلي؟
سمير: لا، ما تخطفش
– هيلاري: مالى فاش تحكي لي؟ وتقولي ساهل ياسر
سمير: يلزمك حمّه، عندكمشي حمّه في واشنطن؟ يا حمّه بالله فسّر ليها
حمّه دخل على الخط: اسمعي، أنا حمه، أنا نقول ليك، قبل ما نقول ليك، عندكمش خالتي مباركة؟
– هيلاري: عندنا باراك… تي، باراك أوباما
حمّه: بريمة ياسر، عندكمشي الفلفل؟
– هيلاري: عندنا، ولكن ياكلوه المكسيكيين
حمّه: بريمة ياسر، تجيبوا قفة مكسيسية فارغة، وتتصور باها خالتك مباركة أوباما المكسيكية، ومن بعد تطلبوا من مصطفى بن جعفر يسكّر البرلمان
– هيلاري: ما عندناش مصطفى بن جعفر
حمّه: زيد قلي ما عندكمش نجيب الشابي
– هيلاري: ما عندناش
حمّه: مالى كيفاش عايشين؟ تعملوا في السياسة من غير هاضم! باهي وعندكمشي كمال الڨضڨاضي؟
هيلاري: ما عندناش
حمّه: مالى شكون باش يقتل شكري بلعيد؟
– هيلاري: وشكونو شكري بلعيد؟ وعلاش نقتلوا فيه؟
حمّه: باش تطيّحوا النهضة
– هيلاري: ما عندناش نهضة
حمّه: مالى علاش عيّطوا لي؟
– هيلاري: باش نطيحوا دونالد ترامب، رئيس الجمهورية
حمّه: المرزوقي ماهو في قرطاج، خلوه، طيّحوا النهضة، وهذاك تو يطيح وحدو في الانتخابات
– هيلاري: يا ولدي آما نهضة؟ ما عندناش نهضة
حمّه: شكون كيفكم، إيجوا عاونونا على النهضة في تونس، جيبولنا سيسي تونس، كيما عملتوا في مصر، والله جابك ربي.