شوف الدمار لزرق في ها البلاد… شوف المقت الأحرف… بلاد غاطسة في الوسخ لعنكوشها.. وفي الفساد من رأسها حتى قدميها.. وبمجالس بلدية أغلبها كلوشارات وطبابلية وبنادرية… كياسات محفرة،،، زبلة في الشوارع، شوارع مظلمة، كلاب سايبة، باش تاخذ رخصة.. يلزم الوزير يصحح… إيه يلزمنا إنتخابات بلدية باش يكون القرار جهوي ومجلس بلدي منتخب يبتعد عن سطوة المعتمد والوالي والبنادرية والزكارى…
– هي اش فما ؟؟؟
قالك النهضة حاضرة ومنظمة وثما إمكانية تجيب نتيجة باهية وتتحصل على المرتبة الاولى في البلديات..
– هيه اشبيه ماهو عندنا ديمقراطية وكذا والي يجيبوا الصندوق نحتكملو الناس الكل…!!!
لا لا.. النهضة حاضرة واحنا نتعاركو والخنيفري عامل مسد ونتهموا في بعضنا ونخون في بعضنا وتشقينا وإترشقنا وتفرقنا وتفارقنا وتفركنا… وواحد هرب بالبهيم ولاخر هرب بالبردعة…!!!
– هيه اش مالي ومالكم… البلاد لازمها انتخبات بلدية في أسرع وقت…
لا يا ولدي النهضة تجي الأولى لذلك نأجلو الإنتخابات حتى ندبرو حانوت كبير يلمنا ويسترنا وحتى نركحو الجو في المعتمدين وفي الولاة ونحط جماعتنا ونفرشو الأرضية ونرضو البهيم ونجيبو البردعة ونلبسوهم على بعضهم ونستنو الشكيمة والزنبيل وبعد نمشو للسيد يجيب معاه الزلاط ايلي باش يسوقنا بيه… وقتها نعملوا انتخابات بلدية..
– هيه وكيف ماتنجموش تجمل لا لبهيم ولا البردعة اش عملنا وقتها..
موش لازم منها الانتخبات البلدية… يزينا من الإنتخابات.. ديمة إنتخابات… خلي هكاكة ولا تسيطر النهضة أو تتغول ويرجعلنا حماية الثورة والارهابين والجزيرة وقطر وتركيا والتنظيم الدولي ونبقوا نناضل من أجل النمط والكرفات و3000 سنة حضارة وخراير تونس وبرّة عاد اش يلزمها روز وفاكية…
– هي توّة يا سيدي برّوا شوفولنا وينو البهيم ووينهي البردعة ووينو الزنبيل ؟؟؟ الزلاط هاو موجود والسيد نستنو في المسؤول الكبير يحل السرة يشوف أشكون فيها…