تدوينات تونسية

عيد إستقلالهم لا يمثلني

عادل بن عبد الله
عيد الإستقلال هو أسطورة وإلا خرافة كبيرة من خرافات “النمط المجتمعي التونسي” (اللي هو مجرد مسخ من النمط المجتمعي الفرنسي ومبادئ الجمهورية اللائكية).
عيد الإستقلال (اللي هو في الحقيقة عيد تواصل الإستعمار بأقل كلفة بالنسبة لفرانسا)، خرافة وظيفتها الأساسية هي حماية بنية متاع تسلط وتخلف وتبعية، بنية حكم جهوية مافيوزية ما عندها حتى علاقة بالشعب إلا في إطار المزايدات الخطابية…
عيد الاستقلال أسطورة كيفو كيف “الأمة التونسية” (اللي ماهياش عربية ولا إسلامية وهي أقرب لأروبا من مكة)، أسطورة كيفو كيف “الإستثناء التونسي” و”3000 حضارة” و”مجلة الأحوال الشخصية” (اللي تحول صراع المواطنين/المواطنات مع الدولة إلى صراع بين المرا والراجل رغم أنهم هوما الزوز ضحايا القمع والنهبة متاع البرجوازية اللاوطنية اللي تحكم).
عيد الاستقلال أسطورة كيفو كيف “ما عندناش ثروات اما عندنا المادة الشخمة”… لكن المادة الشخمة اللي ما تتوجد كان على السواحل ومفقودة ديمة في الدواخل والقواحل.
عيد الاستقلال يحبونا “نفرحو بيه” (بالمعنى التونسي) ونتعاملو معاه بمنطق القطيع موش بطريقة نقدية تفضح المصالح المافيوزية اللي يحمي فيها،
عيد الاستقلال هو عيد الناس اللي ورثت مصالح المستعمر ومازالت تحمي فيها،
عيد الاستقلال هو عيد يفرّح برجوازية النمط وكلاب الحراسة الايديولوجية متاعهم لأنو خرافة من الخرافات اللي تأبّد مصالحهم حتى لو كان الثمن أنهم يرهنوا البلاد ويكرهونا في أرواحنا أكثر وأكثر…
مختصر الحكاية: اعطونا قطاع واحد حققنا فيه الإستقلال (رمزيا وماديا) وأنا مستعد نحتفل بعيد الإستقلال متاعكم. استقلينا إقتصاديا؟ استقلينا ديبلوماسيا؟ استقلينا ثقافيا؟ استقلينا سياسيا؟ وينو الإستقلال اللي تحتفلو بيه… وحتى وثيقة الإستقلال والملاحق متاعها ما شافهم حد.
#سردياتالنمطاستعمارجديد
#الاستقلال
مشروعموشواقع

اترك رد

مقالات ذات صلة

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock