الخميس , 25 أبريل 2019
الرئيسية / تدوينات تونسية / حسيته علي الرياحي موش علي العريّض !

حسيته علي الرياحي موش علي العريّض !

عبد اللطيف علوي

قيمة حضور أيّ سياسي في برنامج تلفزي هي من قيمة محاوره قبل كلّ شيء.
وقتلّي تحطّ روحك أمام شخص ضحل وجاهل وكتلة متع أمراض وأخلاق مزاودية، شخص ماعندو كان أربعة أسئلة غبيّة وبايتة من عام التّيفيس وخارجة عن أيّ راهن سياسيّ، يعني لو وقع بثّ البرنامج سنة 2012 أو 2050 لما شعرت بأيّ فرق!

يسأل فيه على البوس والتبويش وهو يجاوب ويعصر في مخّه ويقلّه حسب الدّوزة متع البوسة!
ويسأل فيه عالمثلية وهاي قطر وهاو راس البهيم!!
وفي الآخر ترصّيله في قعدة تنقية متع نساء، ما بين آمال درا شنوة وجبنون درا كيفاش…
وكرونيكور يرعش بكلّه وبصاقه أكثر من كلامه،
ومنشّط سخيف ما يخلّيهوش يكمّل جملة وحدة مفيدة في موضوع جدّي، ويرجّعه مباشرة لحديث السّرّة، جايبه باش يحطّه قدّامه كالتلميذ الخايب ويشلّكه ويكسّرله هيبته!

وفي الاخر يسجّل عليه موقف أنّو السبسي أفضل رئيس لتونس بعد الاستقلال!
بأمارة شنوّة؟ بأمارة قانون المصالحة ولاّ الزطلة ولاّ بشرى ولاّ العفو على بسيّس ولاّ بنتيشة ولاّ القروي الشابي اللي يفشّخ في النوم ويخلص من دمنا عنده خمسة سنين ولاّ جيش المستشارين اللّي يخصوا في الوزّ ولاّ ولده اللّي عامل شاطح باطح ولاّ اللّعب بالحكومات وسياسة نمرمدوك ولاّ اللعب بالنار في موضوع الجهاز السرّي ولاّ ولاّ ولاّ …
يا سي علي لسنا حميرا لنصدّق أنّك تصدّق ما تقول! ولم يكن أيّ شيء على الإطلاق يضطرّك إلى ذلك! التّوافق وانتهى وخالتي وخالتك وتفرّقوا الخالات، وحتّى المعرّسين يطلّقوا! يزّوكم من سياسة احنا اللّحم وأنت السّكّين، راكم قوّة توا في البلاد وماعادش يخرج عليكم التّصهميم!
عيب على شيبتكم ونضالكم وتاريخكم، بعد العمر والتجارب هذيكا الكلّ، يجي يركب عليكم فروخ عبد الوهاب عبد الله ڨشّ!

#عبداللطيفعلوي

علي العريض

شاهد أيضاً

لمن سوف لن أصوّت ؟

عبد اللطيف علوي الدّاعون إلى المقاطعة يطرحون سؤال الحيرة: لمن سنصوّت؟  ثمّ حين يعجزون عن ...

الثورات لا تؤدّي آليّا إلى إحلال الدّيموقراطيّة

عبد اللطيف علوي الثورات تهدم أنظمة ديكتاتوريّة، لكنّها يمكن أن ينتج عنها ديكتاتوريّات أعتى وأقسى ...