تدوينات ساخرة

كيف تكون ثقفوتا نمّوطا في عشرة دقائق

مالك بن عمر
الشرط الأول: للدخول لعالم النمط الثقفوتي انك تكره الاسلاميين ..ما تعرفش علاش انت.. موش مهم.. المهم تكفر بالريحة متاعهم وتعتبرهم اعداء… وياااا حبّذا لو تبدى تكره الإسلام بيدو… ماذابيك تبدلو… والا تنحي منو حاجات.. وعلاش لا تزيد فيه حاجات.. تبدع يعني…
في نفس الوقت لازمك ما تفلت حتى فرصة باش تعطي رايك في الحج والفلوس الي ماشية للسعودية… وما تفلت حتى فرصة باش تبرز التقزز متاعك من ذبح الاضاحي في العيد الكبير…
الشرط الثاني: لازمك تكون ناشط على الفايسبوك وتسب الثورة والي جابها وتتبنى تظرية المؤامرة الصهيونية على المناضل بن علي… بالتوازي لازم وين تلقى منشور فيه اشاعة تبارتاجيه وتكتب معاه “نبكي عليك بالدممممم يا توووووووونس”… وكان تجرأ واحد من اصحابك وقالك رد بالك راهي اشاعة ويجيبلك الدليل… وحسيت روحك بديت تقتنع الي هي اشاعة وحكاية عورة… لازمك فيسع تفسخلو كومنتارو وتبلوكييييييه الظلامي الجبري متاع وذني…
الشرط الثالث: هو تنمية المواهب النموطية وهذا ما يكون كان كيف اتّبع لطفي انفاق وتحفظ تحاليل مايا عن ظهر قلب باش تناقش بيهم اصحابك في القهوة والا في البار والا في البيانو بار والا حتى في عيد ميلاد ولد اخت نسيبك… المهم تناقش وتبدي رأيك النموطي وديما تحرص انك تبدى النقاش بجملة “مشات البلاد.. مشات…”.
الشرط الرابع: لازمك تكون واثق من النموطية متاعك… ما يهمش الحزب الي اتبعو… جبهة.. نداء.. مشروع.. الكل مع بعضهم.. مش مهم.. المهم افكار نموطية من الباكو تبرق برقان…

اترك رد

مقالات ذات صلة

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock