كلّو من الثورة…
هاذي عبارة تجي على لسان برشة توانسة باش تفسر أي وضعية خايبة والا اي مشهد ما يعجبش…
بالنسبة ليهم ديما الثورة هي السبب… سبب البلاء… سبب المشاكل… سبب الاضرابات… سبب الارهاب…
وعبارة كلّو من الثورة… ديما تجي بعدها عبارة… قبل كنّا خير…
أنا من الناس إلّي فرحت بالثورة وأكثر من هكة فخور بيها…
الثورة هي الي طيحت الخوف وهربت بن علي…
إلّي صار بعد هروب بن علي مش من الثورة…. خاطيها الثورة…
الثورة قامت بواجبها واعطاتنا هدية في طبق… باش التوانسة يتنفسو ويخممو ويبنيو بلادهم..
أما وين وكيفاش باش تبني ؟؟
بالعركة بين اللائيكية والاسلامية ؟؟ والا بالمنظومة الخامجة الي قعدت تتحكم في الدولة والاعلام والاقتصاد… وحتى الثقافة ؟؟ والا بالفوضى والهمجية ؟؟
أحنا صارلنا كيف إلي كانت عندو كرهبة خردة تتحرك بالسيف وديما عند الصلاح وكراسيها من داخل مريشة والصديد فيها ضارب أطنابو…
وكيف جاتو كرهبة جديدة وقوية من باكوها… ساقها وهو ما يعرفش يسوق… دخل بيها في اول حيط وخرج من الحيط وطاح في الفوسي…
و أول استنتاج خرج بيه.. كلّو من #الكرهبة_الجديدة… الكرهبة القديمة خير.
الحقيقة الي ناكرينها هي انو #كلّو_منّا… قبل كنا خايبين وتوة فقنا بخيوبيتنا…