الإثنين ، 20 أغسطس 2018

اعتراف

نور الدين الغيلوفي

بصراحة جماعة الوطد (الوطنيون الديمقراطيون الفصيل الماركسيّ اللينيني الستالينيّ الماويّ) يخدموا مليح ولا يكلّوا ولا يملّوا.. موجودين في كلّ سوق وفي كلّ حضبة.. مع التجّار والسمسارة والهبّاطة واللي يبيعوا في التاي في السوق وآك اللي قاعدين يستنّوا يفضّ السوق باش يلمّوا السَّقَط..

تلقاهم في القصر الرئاسي.. وتلقاهم في الحكومة.. وفي البرلمان.. في الموالاة وفي المعارضة.. وفي اتّحاد الأعراف واتّحاد الشغل.. وتشوفهم في البيران وفي المساجد.. ومنهم اللي يمشي يحجّ.. ويصوموا وساعات يزكّوا..
محسن مرزوق كان يخدم في قطر وبعد الثورة دوّرها للإمارات فلوسهم أكثر.. واجتمع بحفتر يدبّرش دبّابة يدخل عليها البلاد.. دخل النداء وحضر تشكيل الحكومة وتوافق مع النهضة.. وصوّر في جامع الزيتونة ليلة 27 لابس جبّة.. وحرص باش يكون بجنب راشد الغنّوشي.. بعد ما استوالاش.. حلّ حانوت خاص بيه.. وقرّر باش يخرّج النهضة من دفتر السياق الوطنيّ اللّي مخبّيه تحت راسه.. هذا وطد
عبد الناصر العويني متاع مسرحية (بن علي هرب) الليّ بكّت الغنّوشي مشى لقطر وضرب الدّزّة من قناة الجزيرة على آك الجملة اللي قالها وكيف روّح راح يصرخ مع الجموع الهادرة ((لا أمريكا لا قطر..)).. ثمّ سكت عن الكلام المباح… هذا زاده وطد.
منجي الرحوي.. كان بنكاجي مبنّك ما يسمع بيه حدّ.. طلع للمجلس التأسيسي ومن بعد لسدّة البرلمان وقعد يسردك وما يكبر في عينه حدّ.. حتّى ربّي… وهذا ثانا وطد.
سامي الطاهري.. تكرّش حتّى عاد بلا رقبة.. احتلّ المكتب التنفيذي متاع الاتحاد ويحب يحكم البلاد.. وآخرة المخاير قال لك ((الاتحاد يمهل ولا يهمل)).. هاكا قرّر باش يشد بلاصة ربّي… زيدوا هذا للوطد..
عبيد البريكي.. كبيرهم الذي علّمهم الوطنيّة والديمقراطيّة.. قصّة طويلة (راجع فيه مقالنا: حتّى يموت كبار الحومة) “لو كنت مكان عبيد البريكي لسترت ما ستر الله“.. هذا من أسلاف الوطد.. وأجلافهم…

عيني ما تضرّهم..
يحسنون الانتشار.. وما خفيَ من أمرهم كان أعظم.. أدوار متنوّعة ووين تصب تنفع…

شاهد أيضاً

حداثيون “Made in Tunisie”

عزيز كداشي البعض من الحداثيين made in tunisia يحسسك انو البلاد هاذي قاعدة تقلع ومصورخة ...

اترك رد