لا أعرف لماذا تكرهنا الحكومة ؟؟؟

عبد اللطيف علوي
خواطر مواطن صالح بعد كلّ زيادات…
نحن والله شعب طيب، ولن تجد أطيب منا ولو دارت السند و الهند…
لو جات الحكومة تفهم تحطنا في عينيها وتغطي علينا برموشها وتحافظ علينا من ضربة الشمس وضربة الهواء
لوجات تفهم تسهر علينا في الليل باش تغطينا واحد واحد كل ما نتعرّوا ، وتغني عند روسنا حتى نرقدو ويجينا النوم
وتجيب أكبر المختصين في الهندسة الجينية باش يستنسخوا منا شعب احتياط، وتعول منا للزمان باش يكون عندها مخزون استراتيجي إذا لا قدر الله نقصوا منا كعبات في حرب أهلية أو مجاعة أو زلزال أو غيرو…
نحن شعب طيب للغاية وخدوم ومطيع ومسالم ووديع وعاطفي وغفور ونسّاء إلى أبعد الحدود.
يكفينا برج دلاع بارد في الصيف وكورنو قلاس شعبي ومروحة من بقايا الحرب الثانية وتبحبيحة بودورو في أي شطّ مستنقع كي نكون من أسعد شعوب اﻷرض…
يكفينا 4 سوايع ربوخ فوق سطح ولا في مهرجان درجة عاشرة مع سنفور مزاودي أو سنفورة رقاصة كي نحلق فوق السحاب وننسى الحكومة واللي جاب جد الحكومة…
يكفينا ماتش نربحوه بطزّة من السونتر، أو مسلسل فيه مدمرة كيما راكال، أو حتى فوازير متاع عايدة بوبكر، يكفينا سكرة عشية السبت وجونتة كي ننسى الحكومة فين راقدة وعلى فرش شكون راقدة …
يكفينا تخلينا نصلوا 4 ركعات فرض باش نعملوا مواكب لتقبل التهاني بمناسبة ضمان المقاعد اﻷمامية درجة أولى في الجنة…
لا أعرف لماذا تكرهنا الحكومة..؟؟؟
تكونش زعمه معقّدة من شعب قبلنا غرّر بيها وسلبها أعزّ ما تملك، فقرّرت هي تبعا لذلك أن تنتقم منّا وتسلبنا أعزّ ما نملك؟