تدوينات تونسية

أحنا شعب عندنا أزمة كبيرة متاع كاريزما

عبد اللطيف علوي
مشكلتنا في تونس لاهي حقوق ولا حرّيّات ولا تشغيل ولا كفاءات ولا بلّوط…
مشكلتنا بسيطة وواضحة تماما، غير برشه ناس ما يحبّوش يواجهوا الواقع…
احنا عندنا أزمة كبيرة متاع كاريزما…
بورقيبة خرّج الاستعمار بالكاريزما ولا شيء غير الكاريزما، أيّ حاجة أخرى قريتوها ولاّ سمعتوها في الموضوع هذا راهي غالطة…
فرحات حشّاد بنى الاتّحاد وخلاّه أكبر قوّة في البلاد بالكاريزما…
عبد المجيد الشّتّالي، دوّخ المكسيك والألمان والبولونيّين وشعرة لا هزّ كاس العالم بالكاريزما…
بن علي كانت عندو كاريزما كبيرة، آما ماهوش مظهّرها كيما الجماعة الأخرين…
آخر سلالة الكاريزما سيدك الباجي، ربح الانتخابات وفلّق المعارضة وفلّق حزبو وفلّق الدينار والأسعار والحكومة والبنوك، وخلّى ترامب وما أدراك يهزّ التّليفون ويلحلح بيه: بجاه ربّي ايجا زورنا … خلّيني نشوفك قبل منام عيني، وخلاّه ما يمنعش دخول التوانسة… باش؟… يا أخي ماهو بالكاريزما.
آما يا أخي قدّاش منّو الباجي؟ يقطّع روحو؟
الله غالب… احنا شعب عندنا أزمة كبيرة متاع كاريزما من قديم الزمان موش من توّة…
وإذا لزم نستوردو باش نحسّنو السّلالة نستوردو… حتّى لين ناقفوا على رجلينا وتتحسّن أمورنا، ونعودو احنا زاده نصدّرو في الكاريزما…
#عبد_اللطيف_علوي

اترك رد

مقالات ذات صلة

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock