الأحد ، 24 يونيو 2018
الرئيسية / تدوينات / تدوينات تونسية / كملو سبو الغنوشي والنهضة !!

كملو سبو الغنوشي والنهضة !!

ماهر العباسي

راشد الغنوشي
تنجمو تحبوه تنجمو تكرهوه أموركم ولكن الحقيقة واضحة ونفهم الي هي تغشش برشة عباد وتوجع برشة عباد. 
السيد هذا إسلامي كان متشدد ومتشدد برشة وتقرن اسمو بالإرهاب وتحكم عليه بالإعدام رجع لتونس بعد الثورة وقاد الحزب متاعو في إطار القانون والديمقراطية.
غلط برشة وزلط برشة هو وحزبو ومنهم أغلاط تكلفت غالي عالبلاد ووصلت تونس لحافة الهاوية نتيجة الاستقطاب مع او ضد الغنوشي. 

شنوة عمل وقتها ؟
مشى مد يدو لخصمو اللدود وعمل توافق خرج تونس من جحيم الحرب الاهلية لصياغة دستور وانتخابات
التمشي التوافقي خسرو برشة شعبية وخسر حزبو الانتخابات التشريعية وزاد نجح انو يقنع العديد من انصارو انهم يصوتو للسبسي في الرئاسية
وقبل انو يكون لحزبو حضور صوري في الحكومة الاولى رغم انو ثاني كتلة وقعد مالنهار الاول لليوم يساند الرئيس والحكومة
الشيء الي فمة برشة ماهمش يشوفو فيه انو النهضة بالتصرف هذا قاعدة تتمرس عالحكم وقياداتها يتعلمو شنوة معناها تسيير دولة ويربطو علاقات ثقة مع الادارة وقاعدين يتغلغلو في اتحاد الشغل وقاعدين يعملو في علاقات دولية متينة جدا الدليل الي الغنوشي وبنتو حطوهم مراتب متقدمة متاع الشخصيات المؤثرة في العالم العربي والغنوشي استدعاوه لدافوس وقابل اكثر الشخصيات المؤثرة في العالم.

خلاصة : وقت الي مرسي هز الاخوان لمحرقة قضات عالديمقراطية وعلى الاخوان الغنوشي نجح بعلامة حسن جدا في تجنيب حزبو المحرقة وفي تجنيب تونس العودة للدكتاتورية وفرض روحو وحزبو كلاعب أساسي يجب التعامل معه وطنيا واقليميا ودوليا…
في المقابل انتوما شنوة عملتو ؟؟
قعدتو اتبعو في كمشة فاشلين يغنيولكم في نغمة تتمناو انها تطلع صحيحة : هاو قتل شكري هاو كلم العريض قلو اليوم اقتل البراهمي هاو عمل شبكات تسفير هاو حب يقتل سامية عبو هاو شرب قهوة مع أبو عياض هاو تصور مع طوني بلار هاو دفع 600 مليون باش مشى لدافوس هاو صلح سنيه هاو صبغ شعرو… والراجل قاعد يدور في العالم ويخدم في حزبو… وانتوما شنوة عملتو ؟؟ شيء لاهين كان في تقشقيش الحناك… كملو هكاكة صحة ليه الغنوشي ربي عطاه خصوم حمقى.

حكيت عالغنوشي كيفاش نجح أنو يرتقي بمستوى حزبو وكيفاش قياداتو قاعدين يوليو رجالات دولة
كنت نتفرج في عماد الحمامي يحكي على الصحة في تونس… السيد هذا ماعندو حتى علاقة بالميدان وعندو شهرين كهو ملي شد الوزارة أنا قعدت فمي محلول على مدى تمكنو من أغلب الملفات الحارقة متاع أصعب وزارة في تونس وهذا دليل على حاجة واحدة : التعاون التام والكامل من كوادر الوزارة مع عماد الحمامي الي هو بيدو رجعلهم المصعد وكل وين يحكي على حاجة يجبدهم بالخير ويذكر مجهودهم ….كيف جبدولو عالطبة الي قاعدين يهاجرو قال اي هوما سفراء لتونس وينورولنا وجهنا ويدخلو العملة الصعبة وفيهم أساتذة في الطب يمشيو يقعدو مدة ويرجعو وفيهم الشبان الي يلزمنا نلقاو حل باش يرجعو لتونس التضحيات الي عملتها باش تكونهم قبل مايهاجرو وهذي حريتهم… في نفس الوقت وحدة نايبة حاسبة روحها تقدمية نعتت الطبة الي هاجرو بوه على خوه بالجرذان الهاربة من قارب يغرق.
كملو سبو الغنوشي والنهضة والحارزات والشوليقة والالفاظ الخرقاء الي تنم على بهامة وحقد دفين في وقت الي الناس هذومة قاعدين يخدمو ويتحسنو… نم ياحبيبي نم.

شاهد أيضاً

محاربة الفساد بمنوال تنموي فاسد !

محمد كشكار لا يمكن أن نحارب الفساد بمنوال تنموي اقتصادي ليبرالي فاسد ! On ne ...

اترك رد